ქართული ოცნების მაჟორიტარი დეპუტატობის კანდიდატი დიმიტრი ხუნდაძე ცეზარ ჩოჩელს საარჩევნო პერიოდში საჯარო სკოლისთვის თანხების გადარიცხვაში ადანაშაულებს. ამის შესახებ დიმიტრი ხუნდაძემ, დღეს, 13 სექტემბერს გამართულ პრესკონფერენციაზე განაცხადა.

ხუნდაძის მტკიცებით, ცეზარ ჩოჩელის კომპანიამ მცხეთის მუნიციპალიტეტის სოფელ საგურამოს საჯარო სკოლას 2016 წლის 17 აგვისტოს ფინანსური მხარდაჭერის სახით გადაურიცხა 12 145 ლარი. მისივე თქმით, ცეზარ ჩოჩელი 37-ე ოლქში დამოუკიდებელ მაჟორიტარად 2016 წლის 15 აგვისტოს დარეგისტრირდა:

"მსურს მივმართო უწყებათაშორის კომისიას, ყველა საერთაშორისო და ადგილობრივ დამკვირვებელს, შეისწავლონ ეს ფაქტი და გააკეთონ დასკვნა".

On.ge ცდილობს დაუკავშირდეს ცეზარ ჩოჩელს, აღნიშნულ ბრალდებასთან დაკავშირებით, თუმცა, ამ დრომდე ვერ უკავშირდება.