ბანგლადეშმა გაეროს უშიშროების საბჭოს განუცხადა, რომ მიანმარიდან დევნილ როჰინჯ მუსლიმებს აღარ მიიღებს. ეს პირველი შემთხვევაა, როდესაც ქვეყანა როჰინჯებისთვის საზღვრების ჩაკეტვით იმუქრება.

ამჟამად ბანგლადეშის ბანაკებში მილიონზე მეტი როჰინჯი აფარებს თავს, მათგან 700 ათასმა მიანმარი ბოლო ორი წლის განმავლობაში დატოვა. 2018 წელს მიანმარი და ბანგლადეში როჰინჯების რეპატრიაცეზე შეთანხმდნენ. ბანგლადეშმა განაცხადა, რომ ყველა როჰინჯს მიანმარში მომავალი ორი წლის განმავლობაში დააბრუნებდა, ამავე დროს, მიანმარი კვირაში 1 500 როჰინჯს მიიღებდა.

28 თებერვალს გაეროს უშიშროების საბჭოში გამოსვლისას ბანგლადეშის საგარეო საქმეთა მინისტრმა განაცხადა, რომ ლტოლვილებს ვეღარ მიირებს.

"მიანმარში არეულობის გამო არც ერთმა როჰინჯმა დაბრუნება არ ისურვა", — განაცხადა მან.

გაეროში მიანმარის ელჩმა კი აღნიშნა, რომ რეპატრიაცია რთული პროცესია და მოთმინებაა საჭირო.

როჰინჯი მუსლიმები

2017 წლის აგვისტოში მიანმარში, რაკჰაინის რეგიონში როჰინჯების წინააღმდეგ ძალადობრივი ქმედებები განახლდა, რის შედეგადაც 25 ათასი როჰინჯი დაიღუპა, ხოლო 700 ათასი ბანგლადეშში გაიქცა.

სისხლის სამართლის საერთაშორისო სასამართლომ მიანმარში როჰინჯი მუსლიმების დევნის საქმის წინასწარი მოკვლევა დაიწყო. ამას შესაძლოა, მოჰყვეს გამოძიება სამხედრო დანაშაულის. გაერომ სამხედროების მიერ ჩადენილი ქმედებები გენოციდად შეაფასა.

2018 წლის აგვისტოში მიანმარის ხელისუფლებამ უარყო გაეროს ანგარიში, რომლის მიხედვითაც ორგანიზაცია გენოციდში მონაწილე სამხედრო მოსამსახურეების დასჯას ითხოვდა. არმია როჰინჯების კრიზისში თავს დამნაშავედ არ მიიჩნევს.

მიანმარი რომის სტატუტის ხელმომწერი არ არის, რაც ნიშნავს, რომ ჰააგის სასამართლოს იურისდიქცია იქ ვერ გავრცელდება. თუმცა ბანგლადეში, რომელიც როჰინჯების თავშესაფრად იქცა, სტატუტის ხელმომწერია, ამიტომაც სისხლის სამართლის საერთაშორისო სასამართლოს აქვს მოქმედების უფლება.

ამავე თემაზე: