ქართული ოცნების წევრის, დეპუტატ ზაქარია ქუცნაშვილის თქმით, ბიძინა ივანიშვილმა პარტიიდან წასულ წევრებს "მისცა თავისუფალი არჩევანის შესაძლებლობა".

"უთხრა, გინდათ დარჩით და იმუშავეთ, გნებავთ წაბრძანდით, გნებავთ გაგრიცხავთ, აი აირჩიეთო.. თუ ვინმეს გინდათ დაჩაგრულის იმიჯი შეგიქმნათ, თქვით", — ამბობს ზაქარია ქუცნაშვილი ტვ პირველის ეთერში.

ქუცნაშვილის თქმით, ბიძინა ივანიშვილის დაბრუნების ერთ-ერთი მიზეზი იყო, პარტიაში არსებული შეუთანხმებლობა აღმოეფხვრა:

"დღეს მიდის ოპოზიციის ჩანაცვლების პროცესი. თავად ოპოზიცია არ უყურებს ჩვენგან წასულებს სანდოთ და საიმედოდ. ისინი აცნობიერებენ, რომ ეს არის ჩანაცვლების პროცესი".

ბოლო დეპუტატი, ვინც ფრაქცია და პარტია ქართული ოცნება დატოვა ზვიად კვაჭანტირაძეა. მოსამართლეების საკითხის გამო ქართული ოცნება დატოვეს ეკა ბესელიამ, გედეან ფოფხაძემ, ლევან გოგიჩაიშვილმა. ბექა ნაცვლიშვილმა უმრავლესობა კი მას შემდეგ დატოვა, რაც პარლამენტმა დაგროვებით პენსიასთან დაკავშირებით მის კანონპროექტს მხარი არ დაუჭირა. დეპუტატ გია ჟორჟოლიანის თქმით, უმრავლესობა შესაძლოა, სოციალ-დემოკრატებმაც დატოვონ.

მმართველი პარტიიდან დეპუტატების წასვლის შემდეგ ქართულმა ოცნებამ საკონსტიტუციო უმრავლესობა დაკარგა.

ამავე თემაზე: