გაათავისუფლე სასამართლო — ამ მოთხოვნით 22 თებერვალს, 7 საათზე უზენაეს სასამართლოსთან აქცია გაიმართება. აქციის მონაწილეები, სამოქალაქო აქტივისტები სასამართლოდან პარლამენტის შესასვლელისკენ გადაინაცვლებენ.

აქციის ორგანიზატორების თქმით, გააპროტესტებენ პარლამენტის მიერ მიღებულ გადაწყვეტილებას "არ გაწმინდოს სასამართლო კლანური მმართველობისგან".

"მოქალაქეებს გვაქვს ჩვენი მკაფიო პოზიცია, რომელიც ემიჯნება ნაცმოძრაობის წარსულ გამოცდილებას და ქართული ოცნების ქმედებებს, რომელიც დგას აქამდე არსებული კლანის ინტერესების სადარაჯოზე.

ყველას მოგიწოდებთ, შემოუერთდეთ მსვლელობას და ნუ მივცემთ საშუალებას ხელისუფლებას და სასამართლოზე გაბატონებულ კლანს, შეგვაყაროს თვალებში ნაცარი", — წერენ აქციის მონაწილეები.

მსვლელობის პარალელურად პარლამენტში გაიმართება ირაკლი კობახიძის შეხვედრა მოსამართლეებთან, არასამთავრობო სექტორთან და დიპლომატიურ კორპუსთან.

დღეს, 21 თებერვალს პარლამენტმა მხარი არ დაუჭირა ეკა ბესელიასა და 8 დეპუტატის მიერ ინიცირებულ კანონპროექტს მოსამართლეების უვადოდ დანიშვნის დროებით შეჩერების შესახებ. კანონპროექტს ხმა 45-მა დეპუტატმა მისცა, 17-ის წინააღმდეგ.