საარჩევნო ბლოკმა პაატა ბურჭულაძე - მოძრაობა სახელმწიფო ხალხისთვის დღეს, საარჩევნო პროგრამის პრეზენტაცია გამართა, რის შემდეგაც გაიმართა დისკუსია ეკონომიკურ პროგრამაზეც. საარჩევნო ბლოკის დაპირებები ამ მიმართულებით ასე გამოიყურება:

  • განახევრებული ბიუროკრატია - განახევრებული სამინისტროები;
  • მთავრობის ხარჯების ეტაპობრივი შემცირება ეკონომიკის 34%-დან 20%-მდე 4 წელში და 15%-მდე 8 წელიწადში;
  • კონკურენტ ქვეყნებთან შედარებით ყველაზე დაბალი გადასახადები (საშემოსავლო და მოგების გადასახადის 10%-მდე შემცირება; ქონების და იმპორტის გადასახადის გაუქმება; საგადასახადო ტვირთის 17%-მდე შემცირება);
  • უცხოური ინვესტიციების წახალისების ინოვაციური მოდელი;
  • საქართველოს მოქალაქეებისთვის სახელმწიფო ქონების გადაცემა;
  • მილიონ გაჭირვებულ ადამიანს საუკეთესო სამედიცინო მომსახურება;
  • მილიონ გაჭირვებულ ადამიანს ფულადი დახმარება;
  • სტუდენტებს გაჭირვებული ოჯახებიდან განათლების სრული დაფინანსება.

ახალი პოლიტიკური ცენტრი - გირჩისა და საარჩევნო ბლოკის ერთ-ერთმა ლიდერმა ზურაბ ჯაფარიძემ აღნიშნა, რომ სახელმწიფო უნდა დაეხმაროს მხოლოდ გაჭირვებულებს და ფული არ უნდა იხარჯებოდეს მდიდარ და შეძლებულ ოჯახებზე. მისივე თქმით, რეფორმას საჭიროებს მოქმედი სოციალური და ჯანდაცვის სისტემები:

"დღეს გვქონდა საჯარო განხილვა საარჩევნო ბლოკის პაატა ბურჭულაძე სახელმწიფო ხალხისთვის, სადაც წარმოვადგინეთ ეკონომიკური პროგრამა, რომელიც გულისხმობს რეფორმებს, რომლებიც ჩვენ უნდა გავატაროთ ეკონომიკაში, რომ ქვეყანამ მიაღწიოს სწრაფ ეკონომიკურ განვითარებას. მეორე ნაწილი არის სოციალური ნაწილი, რომელიც გულისხმობს, რომ ფული არ უნდა იხარჯებოდეს მდიდარ და შეძლებულ ოჯახებზე და ეს ფული უნდა მიემართოს გაჭირვებულებისკენ, იმისათვის, რომ ქვეყანაში მოხდეს მყისიერად სიღარიბის დაძლევა. მათ შორის რაც გულისხმობს იმას, რომ ჩვენ დახმარებას გავცემთ არა ნახევარ მილიონზე, როგორც გაიცემა დღევანდელი სოციალური დახმარების სისტემით, არამედ რომელიც არის გაწევრიანებული სოციალურად დაუცველთა ბაზაში და რომელიც ითხოვს დახმარებას. ასევე, ცხადია, საუბარი იყო ჯანდაცვის რეფორმაზე, აქაც მიდგომა არის იგივე, სახელმწიფო ეხმარებოდეს იმ ადამიანებს, ვისაც სჭირდება ჯანდაცვის დაფინანსებაში დახმარება, მათ შორის იმ ნაწილშიც, რომ მათ აუნაზღაურდეთ მედიკამენტების ხარჯები, რომლებიც დღეს არ აუნაზღაურდებათ."