შინაგან საქმეთა სამინისტროს ცნობით, დღეს ყიფშიძის ქუჩაზე მომხდარი მკვლელობა გახსნილია და ხელოსნის მკვლელობაში ბრალდებული პირი დაკავებულია:

"შსს-ს თანამშრომლებმა ცხელ კვალზე დააკავეს 1991 წელს დაბადებული კ. ლ. განზრახ მკვლელობისა და ცეცხლსასროლი იარაღის მართლსაწინააღმდეგო შეძენა-შენახვა-ტარების ბრალდებით".

გამოძიების ცნობით, მკვლელობა ურთიერთშელაპარაკების ნიადაგზე მოხდა:

"ბრალდებულმა ვაკის რაიონში, ყიფშიძის ქუჩაზე მდებარე ავტოსახელოსნოს თანამშრომელს, 1971 წელს დაბადებულ რ.მ.-ს ცეცხლსასროლი იარაღიდან გასროლით მრავლობითი ჭრილობა მიაყენა და შემთხვევის ადგილიდან მიიმალა".

შსს-ს ცნობით, ვაკეში მომხდარ მკვლელობაში ბრალდებული სამართალდამცველებმა ზესტაფონში დააკავეს.

გამოძიება განზრახ მკვლელობის და იარაღის მართლსაწინააღმდეგო შეძენა-შენახვა-ტარების ფაქტზე მიმდინარეობს (საქართველოს სსკ-ის 108-ე და 236-ე მუხლებით).