"მნიშვნელოვანია, შეწყდეს სასამართლოს, განსაკუთრებით, იუსტიციის უმაღლესი საბჭოს მოსამართლე წევრების მიმართ ცილისმწამებლური კამპანია", — ნათქვამია განცხადებაში, რომელიც საქართველოს საერთო სასამართლოების მოსამართლეთა 25-ე რიგგარეშე კონფერენციაზე მიიღეს.

მოსამართლეები მიმართავენ საკანონმდებლო და აღმასრულებელ ხელისუფლებას, პარტნიორი ქვეყნების დიპლომატიურ წარმომადგენლობებს და საერთაშორისო ორგანიზაციებს:

"ობიექტურად გაანალიზონ და შეაფასონ მიმდინარე პროცესები, განახორციელონ ყველა აუცილებელი მოქმედება, რათა შეწყდეს ზეწოლა სასამართლო ხელისუფლებაზე და მიეცეს მას შესაძლებლობა მშვიდ გარემოში განაგრძოს საქმიანობა, ხოლო მოსამართლეთა შერჩევის პროცესი წარიმართოს მხოლოდ სამართლებრივი დისკუსიის ფარგლებში, დემოკრატიული პრინციპების დაცვით".

განცხადებაში ნათქვამია, რომ არასამთავრობო ორგანიზაციების გარკვეულმა ნაწილმა დაიწყო უზენაესი სასამართლოს მოსამართლეების შერჩევის "ხელოვნური დისკრედიტაცია", წარდგენილი კანდიდატების მიმართ სიძულვილის ენით საუბარი.

განცხადებაში წერია, რომ მნიშვნელოვანია შეწყდეს სასამართლოს, განსაკუთრებით, მოქმედი იუსტიციის უმაღლესი საბჭოს მოსამართლე წევრების მიმართ ცილისმწამებლური კამპანია.

მათივე განცხადებით, მოსამართლეთათვის უფლებამოსილების შეწყვეტის და იუსტიციის უმაღლესი საბჭოს დაშლის მოთხოვნა, უხეშად ეწინააღმდეგება საქართველოს კონსტიტუციას და სასამართლოს დამოუკიდებლობის უზრუნველყოფის საერთაშორისო სტანდარტებს:

"მოსამართლეთა თანამდებობიდან გადადგომის შესახებ მოთხოვნას არა თუ არ გააჩნია ფაქტობრივი თუ სამართლებრივი საფუძველი, არამედ ეწინააღმდეგება თითოეული ჩვენგანის ნებას და საქართველოს კონსტიტუციით და ყველა მოქმედი საერთაშორისო აქტით დეკლარირებულ გარანტიებს".