საქართველოს საგარეო საქმეთა მინისტრი მიხეილ ჯანელიძე ქალაქ პოტსდამში მიმდინარე ეუთო-ს არაფორმალური მინისტერიალის ფარგლებში ავსტრიის საგარეო საქმეთა მინისტრ სებასტიან კურცს შეხვდა.

კურცი ეუთოს თავმჯდომარის რანგში 1 იანვარს საქართველოში ვიზიტს გეგმავს. საგარეო საქმეთა სამინისტროს ინფორმაციით, მან მინისტერიალზე კიდევ ერთხელ დაადასტურა ავსტრიის მხარდაჭერა საქართველოს სუვერენიტეტისა და ტერიტორიული მთლიანობის შესახებ.

ავსტრიელი დიპლომატი აცხადებს, რომ საქართველომ ევროატლანტიკური ინტეგრაციის გზაზე მნიშვნელოვან პროგრესს მიაღწია.

საქართველოს საგარეო უწყების ცნობით, მინისტერიალზე მინისტრებმა ეუთო-ს ფარგლებში თანამშრომლობის საკითხები განიხილეს, სადაც აღინიშნა, რომ ორგანიზაციის ჩართულობის გაზრდა კონფლიქტების მშვიდობიანი დარეგულირების პროცესში მნიშვნელოვანი იქნება.