ქართული ოცნების დეპუტატი ეკა ბესელია აცხადებს, რომ გუნდში მოსამართლეების დანიშვნის საკითხზე წინააღმდეგობა არ არის ახალი პროცესი და ის ჯერ კიდევ 2017 წლიდან დაიწყო. მისი თქმით, ეს იყო ერთადერთი საკითხი, რაზეც ქონდა კრიტიკული დამოკიდებულება.

როგორც ბესელიამ გადაცემაში აღნიშნა, ქართულ ოცნებაში დაპირისპირება ჰქონდა ირაკლი კობახიძესთან, მამუკა მდინარაძესთან, სოფო კილაძესთან, ანრი ოხანაშვილთან და დავით მათიკაშვილთან.

"გვქონდა ჭიდილი და მაშინ მმივხვდი, რომ მე ვიყავი მიუღებელი გარკვეული ჯგუფისთვის, როგორც ჩემი პრინციპული შეხედულებების მატარებელი ადამიანი" , — განაცხადა ბესელიამ და აღნიშნა, რომ იმ მოსამართლეების უვადოდ დანიშვნა არ შეიძლება, ვინც ნაციონალური მოძრაობის სისტემასთან ასოცირდებოდა.

დაპირისპირება ქართულ ოცნებაში

იურიდიულ საკითხთა კომიტეტის თავმჯდომარე, ეკა ბესელია თანამდებობიდან 27 დეკემბერს გადადგა. მისი თქმით, ამით უზენაესი სასამართლოს მოსამართლეების დამტკიცებას შეუშალა ხელი.

მიუხედავად იმისა, რომ დღემდე არ არსებობს პროცედურა, რომლითაც იუსტიციის უმაღლესმა საბჭომ მოსამართლეობის კანდიდატები უნდა შეარჩიოს, უზენაესი სასამართლოს მოსამართლეობის 10 კანდიდატი უკვე წარდგენილია. ამის გამო, არასამთავრობო ორგანიზაციების ნაწილსა და საბჭოს არამოსამართლე წევრებს პროცესის ობიექტურობასა და მიუკერძოებლობაზე კითხვები უჩნდებათ.

ეკა ბესელიას გადადგომას მმართველ გუნდში დაპირისპირება მოჰყვა. პარლამენტის თავმჯდომარის, ირაკლი კობახიძის თქმით, ბესელიას გადადგომის მიზეზები პარტიის შიდა სამზარეულოა, რომელსაც ნაწილობრივ გარეთ გამოიტანეს.

იურიდიულ საკითხთა კომიტეტის პირველ მოადგილედ გედევან ფოფხაძე 31 დეკემბერს აირჩიეს. საქართველოს პარლამენტის თავმჯდომარე ფიქროს, რომ მისი არჩევა რეგლამენტის დარღვევით მოხდა. ეკა ბესელიას თქმით, რეგლამენტს კარგად იცნობს და იმოქმედა წესების შესაბამისად.

ამასთანავე, პარლამენტის თავმჯდომარემ განაცხადა, რომ თუ ვინმე წავა ქართული ოცნების გუნდის წინააღმდეგ, ამას პასუხი აუცილებლად გაეცემა.