სააპელაციო სასამართლოში უვადო მოსამართლეთ გამწესებული ლევან მურუსიძე აცხადებს, რომ მის მიმართ მიზანმიმართულ ცილისმწამებლურ კამპანიას ნაციონალური მოძრაობა ახორციელებს. ის აცხადებს, რომ ამ კამპანიამ "კულმინაციას თბილისის სააპელაციო სასამართლოს მოსამართლედ უვადოდ განმწესების დღეებში მიაღწია".

"ჩემთვის აბსოლუტურად გასაგებია, რომ ჩემს წინააღმდეგ განსაკუთრებით აგრესიულად, მიზანმიმართულად და ცილისმწამებლურად გაილაშქრა ნაციონალურმა მოძრაობამ, ვინც პასუხისმგებელია სპეციალურად გირგვლიანის საქმესთან დაკავშირებით და ასევე ზოგადად კანონმდებლობაში განხორციელებულ ცვლილებებზე, რომლის პირობებშიც მომიწია ზემოაღნიშნულ საქმეზე გადაწყვეტილების მიღება და რომელმაც ფაქტიურად საკანონმდებლო მარწუხებში მოაქცია სასამართლო ხელისუფლება, ვინაიდან ამით ისინი შეეცადნენ საკუთარი პასუხისმგებლობის ჩემზე გადმოკისრებას", — აცხადებს ლევან მურუსიძე.

მისი თქმით, ის ამ უსამართლო დამღით ცხოვრების გაგრძელებას არ აპირებს. ამასთან, არაფრად უღირს მოსამართლის მანტია.

"მე ასევე ზედმიწევნით კარგად მესმის, რომ ნაციონალური მოძრაობის მიერ გამოცხადებული ნულოვანი ტოლერანტობისა და რეპრესიული სისხლის სამართლის პოლიტიკის პირობებში მოსამართლედ მუშაობა ნამდვილად არ იყო მარტივი. ესეც მოცემულობაა და არც ამ სიმართლისთვის თვალის გასწორება მიჭირს", — აცხადებს მურუსიძე.

ის აცხადებს, რომ საბჭოს მდივნად არჩევის შემდეგ ღიად მოუწოდა მოსამართლეთა კორპუსს გამოეყენებინა შანსი და ეზრუნათ სასამართლოს ჭეშმარიტი დამოუკიდებლობისათვის.

"სწორედ ეს გახდა ჩემზე განხორციელებული საინფორმაციო შტურმის მიზეზი. არადა, სწორედ ჩემმა და ჩემი თანამოაზრეების პრინციპულმა პოზიციამ განაპირობა ის რეალური პროგრესი, რომელსაც სასამართლო სისტემამ მიაღწია ამ წლებში და რომელზეც არა მხოლოდ მშრალი სტატისტიკა, არამედ არაერთი ავტორიტეტული საერთაშორისო კვლევა თუ ინდექსი მეტყველებს", — აცხადებს უვადოდ დანიშნული მოსამართლე.

ლევან მურუსიძე ასევე წერს, რომ მზადაა მედიასთან, არასამთავრობო სექტორთან და პარლამენტარებთან შეხვედრები გამართოს და მის მიმართ არსებულ კითხვებს უპასუხოს.

მოსამართლე ლევან მურუსიძე იუსტიციის უმაღლესმა საბჭომ სააპელაციო სასამართლოში უვადოდ გაამწესა. მურუსიძის უვადო მოსამართლეობას საბჭოს უმრავლესობამ, 11 წევრმა დაუჭირა მხარი. ლევან მურუსიძის სახელს არაერთი გახმაურებული საქმე უკავშირდება. მათ შორისაა, სანდრო გირგვლიანის, სულხან მოლაშვილის, გიორგი მიქიაშვილისა და ე.წ. მეამბოხე მოსამართლეების საქმეები. სტრასბურგის სასამართლომ ყველა ამ საქმეში სახელმწიფო დამნაშავედ ცნო და ქართული სასამართლო გააკრიტიკა. მურუსიძის მიღებულმა გადაწყვეტილებებმა სახელმწიფო ჯამში 83 000 ევროთი აზარალა.

გაიგე მეტი:

• რა ვიცით ლევან მურუსიძის შესახებ