ღუდუშაურის კლინიკაში გარდაიცვალა გლდანის მერვე საპყრობილის პატიმარი, რომელიც თავს უდანაშაულოდ მიიჩნევდა და პროტესტის ნიშნად შიმშილობდა. პენიტენციურ სამასხურში ფაქტს ადასტურებენ და აცხადებენ, რომ ბრალდებული უარს ამბობდა მკურნალობაზე.

პენიტენციური სამსახურის ინფორმაციით, გიორგი ფასიეიშვილი გლდანის N8 საპყრობილეში პირველ აგვისტოს მიიყვანეს და მან შიმშილობა დაიწყო. მათი თქმით, სექტემბრიდან სისუსტის გამო, ფასიეიშვილი ხუთჯერ იყო ჰოსპიტალიზებული N18 სამკურნალო დაწესებულებაში, სადაც უარს აცხადებდა სამედიცინო დახმარებაზე და ისევ N8 დაწესებულებაში დაბრუნებას მოითხოვდა.

უწყების განცხადებით, 5 დეკემბერს ფასიეიშვილი ჩაერთო სუიციდის პრევენციის პროგრამაში, 8 დეკემბერს კი კვლავ გადაიყვანეს ღუდუშაურის სამედიცინო ცენტრში, თუმცა მან მანქანიდან გადასვლა არ ისურვა და N18 დაწესებულებაში დაბრუნდა.

მათი თქმით, ფასეიშვილი 14 დეკემბერსაც გადაიყვანეს ღუდუშაურის კლინიკაში და იმავე დღეს დაბრუნდა პენიტენციურ სამკურნალო დაწესებულებაში. რის შემდეგაც, 15 დეკემბერს ის კვლავ გადაიყვანეს ღუდუშაურის კლინიკაში, სადაც დაუსვეს ღვიძლის მწვავე და ქვემწვავე უკმარისობის, დაუზუსტებელი თრომბოიტოპენიის, დაუზუსტებელი კოაგულოპათიის, ბოდვითი აშლილობის, ჰიპოგლიკემიის დიაგნოზი.

უწყების განცხადებით, ბრალდებული გადაადგილებისას სარგებლობდა ეტლით, აღენიშნებოდა წონის დეფიციტი, საერთო სისუსტე და კვლავ უარს აცხადებდა გამოკვლევებსა და გასინჯვაზე. მათი განმარტებით, გარდაცვალებამდე ფასეიშვილი იმყოფებოდა ღუდუშაურის თერაპიულ განყოფილებაში, სადაც უცბად განუვითარდა ქოშინი, აპნოე და მიუხედავად ექიმების მცდელობისა და ჩატარებული სარეანიმაციო ღონისძიებებისა 17 დეკემბერს გარდაიცვალა.