თბილისის მერი, დავით ნარმანია საკრებულოს სხდომაზე მივიდა, თუმცა შენობაში შესვლამდე აქციის მონაწილეები მას შეძახილებით დახვდნენ. გარდა ამისა, მათ ჰქონდათ ნაჯახიც და ამბობდნენ, რომ სწორედ ეს არის ნარმანიას მერობის სიმბოლო. საკრებულოს რიგგარეშე სხდომა რამდენიმე წუთის წინ დაიწყო.

ერთიანი ნაციონალური მოძრაობის წევრმა, ირაკლი აბესაძემ განმარტა, რომ 2 წლის განმავლობაში დედაქალაქს ჰყავს მერი, რომელმაც ვერცერთი ეფექტური და სწორი გადაწყვეტილება ვერ მიიღო.

"იღებს თუ არა ნარმანია რაიმეზე გადაწყვეტილებას, იღებს თუ არა ის პასუხისმგებლობას დანიშნულ მთავრობის წევრებზე, კორუფციაზე, ქრთამის აღების ფაქტებზე, ჩავარდნილ პროექტებზე, გაჩეხილ ხეებზე, გასხვისებული ბოტანიკური ბაღის ნაწილზე და ა.შ".

რესპუბლიკელების წევრმა, დავით ზურაბიშვილმა კი განაცხადა, რომ ამ ეტაპზე ყველაზე სწორი გადაწყვეტილება, თბილისის მერის გადადგომა იქნებოდა:

"თუ ის თავისი ნებით გადადგება, ეს მოხსნიდა ძალიან ბევრ პრობლემას. დაინიშნება თბილისის მერის ახალი არჩევნები და თბილისელები აირჩევენ იმ მერს, რომელიც იქნება მათი ინტერესების გამომხატველი. ეს, ვფიქრობ, არსებულ სიტუაციაში ყველაზე სწორია, რამდენადაც ნარმანიას ნდობის კრედიტი ამოწურული აქვს".

საკრებულოს დამოუკიდებელი დეპუტატი, ალეკო ელისაშვილი კი ამბობს, რომ ნარმანია ამ დროის განმავლობაში არცერთხელ არ თქვა, რეალურად ვინ არის ყაზბეგის 24 ნომერში მოჭრილ ხეებზე პასუხისმგებელი:

"ვერ ამბობს, ეშინია და იმიტომ. არ შიძლება ამ ნარმანიას შიშებს და მის არაეფექტურობას ვუყუროთ. და მის უხერხემლობას, როდესაც ისედაც უმძიმესი ვითარებაა, ჰაერი არის ძალიან დაბინძურებული, ონკოლოგიური დაავადებები არის ექვსჯერ გაზრდილი".

პარალელურად ერთიანი ნაციონალური მოძრაობა ნარმანიას გადადგომის მოთხოვნით ხელმოწერებს აგროვებს.

თბილისის მერი საკრებულოს რიგგარეშე სხდომაზე საკრებულოს ოპოზიციის მოთხხოვნით მას შემდეგ მივიდა, რაც ყაზბეგის 24 ნომერში 13 ასწლოვანი, საღი ხე გაჩეხეს.