ხორავას ქუჩაზე მოკლულის მამამ, ზაზა სარალიძემ ტრაგედიის ერთი წლის შემდეგ რუსთაველის გამზირიდან ხორავას ქუჩამდე მდუმარე მსვლელობა გამართა. ზაზა სარალიძეს თან ახლდნენ მხარდამჭერები, მალხაზ მაჩალიკაშვილი და მის მოკლული შვილის მეგობრები.

ზაზა სარალიძე მსვლელობისას სანთლებს ანთებდა. პირველად სანთელი 51-ე სკოლასთან დაანთო, სადაც ყველაფერი დაიწყო. მან ასევე სკოლასთან მიიტანა მოკლული მოზარდების დავით სარალიძისა და ლევან დადუნაშვილის ფოტოები.

ფოტო: გელა ბოჩიკაშვილი On.ge

ფოტო: გელა ბოჩიკაშვილი On.ge

მსვლელობა ხორავას ქუჩაზე დასრულდა. ზაზა სარალიძემ განაცხადა, რომ არ გაჩერდებოდა სანამ თავისი შვილის მკვლელი არ დაისჯებოდა.

"ზუსტად ამ ადგილზე, სადაც ჩემმა შვილმა სული დალია, პირობას ვდებ არავის გავახარებ, არც ერთ მკვლელს და არც ერთ ხელის დამფარებელს, ყველა კანონის წინაშე აგებს პასუხს", — თქვა მან.

ფოტო: გელა ბოჩიკაშვილი / On.ge

ფოტო: გელა ბოჩიკაშვილი On.ge

მისი თქმით, ადგილზე, სადაც მისი შვილი მოკლეს, მესამედ იყო.

"მესამედ ვარ ამ ადგილზე მოსული, ვერ ამოვდივარ, რადგან თავიდან მიდგება თვალწინ ეს ტრაგედია. აგერ იდგა წითელი მანქანა, წინ ბავშვი მოუკლეს და რეაგირება არ მოუხდენია. ეს რისხვა სად წაუვა? თან ორი შვილის მამა ყოფილა. დღეს ის ხალხი მოკვდა ამ ბიჭებთან ერთად, ვინც კი ჩვენს მიმართ ტალახი ისროლა იქიდან გამომდინარე, რომ მკვლელები გადაეფარათ", — განაცხადა სარალიძემ.

ზაზა სარალიძე მისი შვილის მკვლელის დასჯას ამ დრომდე უშედეგოდ ითხოვს. თითქმის 3 თვეა, ის, პანკისში მოკლული თემირლან მაჩალიკაშვილის მამასთან ერთად, პარლამენტის შენობის წინ პერმანენტულ აქციას მართავს.

ხორავას ქუჩაზე მოზარდების დაპირისპირების დროს ლევან დადუნაშვილი ადგილზე დაიღუპა, დათუნა სარალიძე კი მრავლობითი ჭრილობებით საავადმყოფოში 2 დეკემბერს გარდაიცვალა.

გაიგე მეტი: მკვლელობა ხორავას ქუჩაზე