"მივიღეთ გადაწყვეტილება, რომ ვკითხოთ აზრი ჩვენს მხარდამჭერებს. გავუზიაროთ მათ ჩვენი გეგმები", — განაცხადა გაერთიანებული ოპოზიციის საპრეზიდენტო კანდიდატმა გრიგოლ ვაშაძემ. მისი თქმით, მხარდამჭერებს დღეს, 29 ნოემბერს, 18 საათზე ფილარმონიაში შეხვდება.

ვაშაძის თქმით, სურთ, მხარდამჭერებმა მათი გეგმები შეაფასონ და ამ გეგმების განხორციელებაზე თანხმობა მისცენ. მისივე თქმით, გეგმების შესახებ ჟურნალისტებს მხოლოდ შეხვედრის შემდეგ ამცნობს.

რუსთავი 2-ისა და იმედის დაკვეთილი ეგზიტპოლებისა და ცესკოს პირველადი მონაცემების მიხედვით არჩევნებში სალომე ზურაბიშვილმა გაიმარჯვა. ექსპრეზიდენტმა მიხეილ საააკაშვილმა განაცხადა, რომ არჩევნების შედეგებს არ აღიარებს და საზოგადოებას დაუმორჩილებლობისკენ მოუწოდა.

ორი ეგზიტპოლის შედეგები

იმედის შედეგებით, საპრეზიდენტო არჩევნებში მმართველი გუნდის მიერ მხარდაჭერილ კანდიდატს, სალომე ზურაბიშვილს ხმების 58 პროცენტი აქვს. გაერთიანებული ოპოზიციის პრეზიდენტობის კანდიდატმა, გრიგოლ ვაშაძემ კი ხმების 42 პროცენტი მიიღო.

რუსთავი 2-ის ეგზიტპოლის შედეგების მიხედვით, საპრეზიდენტო არჩევნებში მმართველი გუნდის მიერ მხარდაჭერილი კანდიდატი, სალომე ზურაბიშვილი 55 პროცენტით იგებს. გაერთიანებული ოპოზიციის პრეზიდენტობის კანდიდატმა კი ხმების 45 პროცენტი მიიღო. რუსთავი 2-მა ედისონ რისერჩის ეგზიტპოლის 17:00 საათის მონაცემები გამოაქვეყნა.

ამავე თემაზე: