ნაციონალური მოძრაობის ერთ-ერთმა ლიდერმა, ნიკა მელიამ განაცხადა, რომ საპრეზიდენტო არჩევნების მეორე ტური ღირსების საკითხია. პოლიტიკოსის თქმით, შეუძლებელია უმაღლეს მთავარსარდლად ის ადამიანი აირჩიონ, ვისაც მიაჩნია, რომ ომი მტერ სახელმწიფოსთან დაიწყო მისმა სამშობლომ.

"უაღრესად მნიშვნელოვანი არჩევნებია ღირსების თვალსაზრისით, ჩვენი მომავლის თვალსაზრისით. ეს არჩევნები არ არის უბრალო არჩევნები, ეს არის რეფერენდუმი. ჩემთვის მაგალითად, ეს არ არის არჩევნები, სადაც უბრალოდ რომელიღაც კანდიდატს ვირჩევთ", — განუცხადა ნიკა მელიამ ჟურნალისტებს.

საპრეზიდენტო არჩევნების მეორე ტურში საკუთარი არჩევანი უკვე დააფიქსირა საქართველოს პრემიერ-მინისტრმა მამუკა ბახტაძემ, ევროპული საქართველოს ყოფილმა პრეზიდენტობის კანდიდატმა, დავით ბაქრაძემ, ასევე გაერთიანებული ოპოზიციის პრეზიდენტობის კანდიდატის, გრიგოლ ვაშაძის მეუღლემ ნინო ანანიაშვილმა.

დღეს, 28 ნოემბერს საქართველოში საპრეზიდენტო არჩევნების მეორე ტური იმართება. საქართველოს მასშტაბით დილის რვა საათზე საარჩევნო უბნები გაიხსნა და ხმის მიცემის პროცესი დაიწყო.

მეორე ტურში მონაწილეობას გაერთიანებული ოპოზიციის კანდიდატი გრიგოლ ვაშაძე და მმართველი პარტიის მხარდაჭერილი კანდიდატი სალომე ზურაბიშვილი იღებენ.