დღეს თბილისის მერიაში მერსა და მოქალაქეებს შორის გამართული შეხვედრა გამწვანების რეგულაციების თემაზე წარუმატებლად დასრულდა. მხარეები არცერთ საკითხზე შეთანხმებულან.

შეხვედრა მას შემდეგ ჩაიშალა, რაც თბილისის მერმა მოძრაობა მწვანე მუშტის აქტივისტს, ირაკლი კუპრაძეს, შეურაცხმყოფელი სიტყვებით მიმართა.

როგორც On.ge-ს ირაკლი კუპრაძემ უთხრა, შეხვედრა უნდა ყოფილიყო საჯარო, თუმცა რიგ არასამთავრობოებს მერიამ რეგისტრაციის გავლის უფლება არ მისცა:

"წარმოდგენილი იყო მხოლოდ 3 მოძრაობა: მწვანე მუშტი, მწვანე ალტერნატივა და პარტიზანული მებაღეობა. მდგომარეობა დაიძაბა, რადგან მხოლოდ სამი წარმომადგენელი ვიყავით, ხოლო მერიას მოწვეული ჰყავდა 40 ე.წ. ექსპერტი, რომლებმაც დაიწყეს საუბარი იმაზე, რომ თბილისში კლიმატის მდგომარეობა გამოწვეულია გლობალური დათბობით და არაფერ შუაშია მწვანე საფარის შემცირება, ან ახალი მშენებლობები და მათი დაგეგმარება".

მერიას მოწვეული ჰყავდა 40 ე.წ. ექსპერტი, რომლებმაც დაიწყეს საუბარი იმაზე, რომ თბილისში კლიმატის მდგომარეობა გამოწვეულია გლობალური დათბობით და არაფერ შუაშია მწვანე საფარის შემცირება, ან ახალი მშენებლობები და მათი დაგეგმარება

ირაკლი კუპრაძე

ირაკლი კუპრაძის თქმით, შეხვედრაზე მიწვეული ექსპერტები, მეტყევეები, მერიისა და გამწვანების სამსახურის თანამშრომლები საუბრობდნენ იმაზე, რომ პრობლემები ასე უცბად ვერ მოგვარდება.

"ეს იყო მიზანმიმართულად დაგეგმილი პიარღონისძიება მერიის მხრიდან, რომელშიც ჩვენ მონაწილეობას ვერ მივიღებდით" - აცხადებს ირაკლი კუპრაძე.

მწვანე მუშტის აქტივისტის განმარტებით, წარმოდგენილმა მოძრაობებმა მერს მოსთხოვეს გამწვანების სამსახურის უფროსის გადადგომა:

"დავით ნარმანიამ ეს მოთხოვნა არ დააკმაყოფილა, გვეძახა ქუჩის დემაგოგები და გამოგვიშვა ლანძღვითა და უშვერი სიტყვების ძახილით. ამაზე პასუხის ღირსადაც ვერ ჩავთვლით, მან წარმოაჩინა თავისი სახე, როგორი ხელმძღვანელია თბილისის, რას აკეთებს. ვერაფერზე ვერ შევთანხმდით, ეს იყო დაგეგმილი პიარაქცია".

ირაკლი კუპრაძის თქმით, სამივე მოძრაობამ დატოვა შეხვედრა:

"ნარმანია ვერ მოახერხებს თბილისის დამოუკიდებელი მოძრაობების ფონზე გაიკეთოს პიარი, ვინაიდან ჩვენ ამის უფლებას არ მივცემთ".

მერიაში გამართულ შეხვედრას ექსპერტები, არასამთავრობო ორგანიზაციების წარმომადგენლები, საკრებულოს თავმჯდომარე და საკრებულოს წევრები ესწრებოდნენ.