სახალხო დამცველის აპარატი ოთხ ახალ მანქანას ყიდულობს. ავტომობილების შესაძენად ტენდერი გამოცხადდა, რომლის ღირებულება 180 ათასი ლარია, რაც, საშუალოდ, ერთ მანქანაზე 45 ათასია.

სახალხო დამცველის პირველი მოადგილე, თამარ გვარამაძე On.ge-სთან საუბრისას ახალი მანქანების შესყიდვას აპარატის საჭიროებებით ხსნის. მისი თქმით, რამდენიმე სტრუქტურულ ერთეულს, რომელიც მუდმივად ახორციელებს მონიტორინგს, ქალაქგარეთ სჭირდებათ გადაადგილება. გარდა ამისა, უწყებაში რეორგანიზაციის შემდეგ იგეგმება უფლებათა დარღვევისა და მოსახლეობაში არსებული პრობლემების საკითხებზე მუშაობის გააქტიურება.

გვარამაძე ამბობს, რომ აპარატში 20-მდე ავტომობილია, საიდანაც დიდი ნაწილი მოძველდა. მათ შორის, 13 ერთეული 2009 წელს ევროკავშირის პროექტის ფარგლებში გადაეცათ და სამი კი გაფუჭებულია, რომელთა გასაყიდად გადაცემაც ფინანსთა სამინისტროსთვის იგეგმება.

ამ მომსახურების შეძენამდე, დაახლოებით ერთი წლით ადრე, აპარატმა წინა ომბუდსმენის დროს ნაყიდი მანქანა ფინანსთა სამინისტროს მომსახურების სააგენტოს გასაყიდად გადასცა. 105 ათასად ნაყიდი მანქანა 61, 2 ათასად გაიყიდა.

"დღესაც რომ გვქონდეს სარგებლობაში ეს მანქანა, ჩვენი მაღალი მოთხოვნების მიუხედავად, დღესაც გადასცემდა ფინანსთა სამინისტროს. ის მახასიათებლები არის ბიზნესკლასის და უხერხულია, სახელმწიფო აპარატს ჰქონდეს მსგავსი მანქანა... საბოლოო ჯამში, ჩვენი აპარატი დაზარალდა, თუმცა საკმაოდ გამიზნულად და გააზრებულად დავაბრუნეთ ეს სატრანსპორტო საშუალება. ახლაც რომ იყოს ეს საკითხი გადასაწყვეტი, ახლაც იგივეს გავაკეთებდით", — ამბობს გვარამაძე.

ომბუდსმენის პირველი მოადგილის თქმით, 20-მდე ავტომობილიდან 17-მდე ე.წ. განპირობებული მანქანაა. ეს იმას ნიშნავს, რომ ისინი ერთ კონკრეტულ პირს, სახალხო დამცველს, მის მოადგილეებს, ან აპარატის სხვა თანამშრომლებს ემსახურებიან. ის განმარტავს, რომ, როცა ეს თანამშრომლები ისვენებენ, ან მივლინებაში არიან, მანქანები მათ კოლეგებს ემსახურებიან.