ჩვენი საყვარელი სერიალების ყურების დროს, ხშირად ვერც კი ვფიქრობთ, რა რთული გზა გაიარა საბოლოო პროდუქტმა სრულყოფილი სახის მიღებამდე.

ამ ძალიან გრძელ და რთულ გზაზე კი ერთ-ერთი მთავარი გმირი კასტინგის მენეჯერია, რომელმაც როლისთვის სრულყოფილი მსახიობი უნდა მოძებნოს. ამისთვის კი ასობით მსახიობს სინჯავს და მოთმინებით ელოდება როდის გამოჩნდება ის ერთადერთი და განუმეორებელი.

ალბათ, ხვდებით, რომ ეს პროცესი ძალიან დამქანცველია, სწორედ ამიტომ, ხშირად კასტინგი მენეჯერები რომელიმე როლზე საკუთარ თავსაც ამტკიცებენ.

დღეს ასეთ ოთხ შემთხვევაზე გიამბობთ:

ფილის სმიტი - The Office

ფილის სმიტი, რომელმაც სერიალ ოფისში ერთ-ერთი ყველაზე დასამახსოვრებელი პერსონაჟი შექმნა, სინამდვილეში კასტინგის მენეჯერის ასისტენტი იყო. მისი ერთადერთი მოვალეობა მსახიობების შერჩევასთან ერთად, იყო ისიც, რომ სცენარის კითხვის დროს ამა თუ იმ პერსონაჟს როლის მორგებაში დახმარებოდა. საბოლოოდ, ფილისმა იმდენად კარგად გაართვა თავი დაკისრებულ მოვალეობას, რომ მისი და კასტინგის მენეჯერის, ბენ ჰარის გადაწყვეტილებით, სერიალში როლიც მიიღო. რაც მთავარია, ამ შოუში თამაშის შემდეგ, კასტინგ მენეჯერობაზე უარი თქვა და მთელი აქცენტი მსახიობის კარიერაზე გადაიტანა.

ეიპრილ ვებსტერი - Alias

ეიპრილ ვებსტერი 2002 წელს სერიალ Alias-ის კასტინგ მენეჯერი იყო. თუმცა ამას ხელი არ შეუშლია იმაში, რომ მისი პირველი და ამ ეტაპზე ბოლო როლი სწორედ ამ შოუს ერთ-ერთ ეპიზოდში, Almost Thirty Years, შეესრულებინა. ეიპრილი მსახიობებს არჩევდა ისეთ სერიალებში სათამაშოდ, როგორებიც არის - Lost, American Gothic, Criminal Minds და ა.შ.

ეკა მჟავანაძე - ჩემი ცოლის დაქალები

ეკა მჟავანაძის ბიოგრაფია არაერთ საინტერესო როლს იტევს, როგორც კინოში შესრულებულ, ასევე თეატრის სცენასა და ტელეეკრანზე. მჟავანაძე მარ­ჯა­ნიშ­ვი­ლის თე­ატ­რის მსა­ხი­ობია, თუმცა ამას ხელი არ შეუშლია ახალი პროფესია აეთვისებინა და კასტინგ მენეჯერი გამხდარიყო. სწორედ მისი დამსახურებაა ის, რომ ქართული ფილმებისა თუ სერიალების უმეტესობაში, ამა თუ იმ პერსონაჟს სწორად შერჩეული მსახიობი თამაშობს. მჟავანაძე არჩევდა მსახიობებს ყველაზე პოპულარული ქართული სერიალის, ჩემი ცოლის დაქალებისთვისაც და თავადაც ასრულებს ერთ-ერთ როლს. ის ზაზას დედის, ნაირას როლშია.

რობერტ სტერნი - Game of Thrones

რობერტ სტერნი ჰოლივუდში ერთ-ერთი ყველაზე მოთხოვნადი კასტინგ მენეჯერია. მას უმუშავია ისეთ მასშტაბურ პროექტებზე, როგორებიცაა Game of Thrones და The Crown. მიუხედავად ამისა, ის ცდილობს მსახიობის პროფესიაშიც მოსინჯოს ძალები და ხშირად ჩნდება ამა თუ იმ შოუში. მაგალითად, ის სამეფო კარის თამაშების ოთხ ეპიზოდში გამოჩნდა. მართალია მან GOT-ში სამეფო ამალის ერთ-ერთი წევრის, ძალიან ეპიზოდური როლი შეასრულა, თუმცა ამ დავალებასაც წარმატებით გაართვა თავი.