თერჯოლის გადასახვევთან, ავტობანზე ავარიის შედეგად ოთხი ადამიანი დაშავდა. შემთხვევა, დაახლოებით, ერთი საათის წინ მოხდა.

როგორც შინაგან საქმეთა სამინისტრომ On.ge-ს განუცხადა, პირველადი ინფორმაციით, მსუბუქი ავტომანქანა სწრაფად მოძრაობისას გზის სავალი ნაწილიდან გადავიდა და ამობრუნდა.

უწყების ინფორმაციით, დაშავებულთაგან სამი მგზავრი და ერთი მძღოლია. შსს-ს ცნობით, საავადმყოფოში გადაყვანისას დაშავებულები კონტაქტურები იყვნენ, თუმცა ტვ პირველი იუწყება, რომ მგზავრთა მდგომარეობა მძიმეა. მათივე ინფორმაციით, მანქანა იმ საქორწინო კორტეჟში შედიოდა, რომელიც თბილისიდან ზუგდიდისკენ მიემართებოდა.

საქმეზე გამოძიება საქართველოს სისხლის სამართლის კოდექსის 276-ე მუხლის პირველი ნაწილით დაიწყო, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს, რამაც ჯანმრთელობის ნაკლებად მძიმე დაზიანება გამოიწვია.