პოლიტიკური პარტია გირჩის თავმჯდომარე, იაგო ხვიჩია ამბობს, რომ პარლამენტის თავმჯდომარის განცხადება საკონსტიტუციო სასამართლოს გადაწყვეტილებების ჩარჩოში მოქცევის შესახებ დამღუპველია მთავრობისა და ქვეყნისთვის. ამის შესახებ ხვიჩიამ On.ge-სთან ისაუბრა.

"ქვეყანა, რომელიც საკონსტიტუციო სასამართლოს, ადამიანების უფლებების დაცვის გარანტს, ფარგლებში სვამს დიდი აზრი არ უწერია მაგ ქვეყანას და მთავრობას და ამას ვერ უშველის სასულიერო პირთა ლოცვა-კურთხევები", — განაცხადა ხვიჩიამ.

გირჩის თავმჯდომარე აცხადებს, რომ პარტია ამ ეტაპზე არ აპირებს ამ გადაწყვეტილების რაიმე ფოირმით გაპროტესტებას. მისი თქმით, ქართველმა ხალხმა თავად უნდა გადაწყვიტოს დაუჭერს თუ არა მხარს "ფარისეველ მთავრობას და ეკლესიას ასეთი შეთქმულების აღსრულებაში".

"თვითონ კონსტიტუციონალისტი კობახიძის მიერ სიტყვათა კომბინაცია "ჩარჩოში მოვაქცევთ საკონსტიტუციო სასამართლოს გადაწყვეტილებას" მიანიშნებს იმაზე, თუ ვინ იყო საკონსტიტუციო ორგანოს თავმჯდომარე ქვეყანაში და ვინ დაგვიწერა კონსტიტუცია", — განაცხადა ხვიჩიამ.

პარლამენტის თავმჯდომარემ, ირაკლი კობახიძემ პატრიარქთან შეხვედრის შემდეგ განაცხადა, რომ შესაძლოა იმსჯელონ ცვლილებებზე, რომელიც ნარკოპოლიტიკის საკითხებში საკონსტიტუციო სასამართლოს გადაწყვეტილებებს შეზღუდავს. მისივე თქმით, პატრიარქთან შეხვედრის დროს ისაუბრეს საკონსტიტუციო სასამართლოს როლზე და მიღებულია პრინციპული გადაწყვეტილება, რომ საკონსტიტუციო სასამართლოს გადაწყვეტილებები ნარკოპოლიტიკასთან დაკავშირებით ჩარჩოში მოექცეს.

საპატრიარქოში შეხვედრის შემდეგ მთავრობამ გადაწყვეტილება მიიღო და კანაფის კონტროლის შესახებ კანონპროექტს პარლამენტიდან გამოიწვევს.