საქართველოს საგარეო საქმეთა მინისტრს, დავით ზალკალიანს ორი ახალი მოადგილე ჰყავს: ალექსანდრე ხვთისიაშვილი და მიხეილ ნინუა. მათ მინისტრის მოადგილეების პოსტზე გიორგი შარვაშიძე და ზვიად გონაძე შეცვალეს. შესაბამისი ბრძანება საქართველოს პრემიერ-მინისტრმა, მამუკა ბახტაძემ 31 ოქტომბერს გამოსცა.

საგარეო საქმეთა სამინისტროში On.ge-ს განუცხადეს, რომ გიორგი შარვაშიძე ელჩად წავიდა, ხოლო ზვიად გონაძე თანამდებობა პირადი განცხადების საფუძველზე დატოვა.

საგარეო უწყების მიერ გავრცელებულ განცხადებაში ვკითხულობთ, რომ ალექსანდრე ხვთისიაშვილი მინისტრის მოადგილედ წარდგენამდე, 2015 წლიდან ხელმძღვანელობდა საგარეო საქმეთა სამინისტროს საერთაშორისო ეკონომიკურ ურთიერთობათა დეპარტამენტს. საგარეო საქმეთა სამინისტროში სხვადასხვა დროს იყო ევროინტეგრაციის დეპარტამენტის ევროკავშირის პოლიტიკის ანალიზისა და პროგრამების კოორდინაციის სამმართველოს უფროსი და მსოფლიო სავაჭრო ორგანიზაციების სამმართველოს მრჩეველი. ალექსანდრე ხვთისიაშვილს 2017 წელს მინიჭებული აქვს საგანგებო და სრულუფლებიანი დესპანის დიპლომატიური რანგი. მინისტრის მოადგილის რანგში ის მოვალეობის შესრულებას 2018 წლის 1 ნოემბრიდან შეუდგება.

მიხეილ ნინუა 2005-2006 წლებში საქმიანობდა საგარეო საქმეთა სამინისტროს საკონსულო დეპარტამენტში; მას შემდეგ ეკავა საქართველოს ეკონომიკისა და მდგრადი განვითარების მინისტრის მოადგილის, საქართველოს პრეზიდენტის ადმინისტრაციის უფროსის მოადგილის, საქართველოს პრეზიდენტის ადმინისტრაციაში მოქალაქეთა კონსტიტუციური უფლებების უზრუნველყოფის სამსახურის უფროსის თანამდებობები.

ის სხვადასხვა დროს გახლდათ ფოთის პორტის სამეთვალყურეო საბჭოს წევრი, შპს საქართველოს რკინიგზის სამეთვალყურეო საბჭოს თავმჯდომარის მოადგილე.

2010 წელს საქმიანობა განაგრძო კანადურ-ბრიტანულ ნავთობსაძიებო კომპანია Tethys Petroleum Limited-ში, სადაც ჯერ ტაჯიკეთში არსებული კომპანიის წარმომადგენლობას ხელმძღვანელობდა, ხოლო 2013 წლიდან 2016 წლამდე წარმოადგენდა ზემოთ აღნიშნულ კომპანიას ყაზახეთის რესპუბლიკაში.

2015-2017 წლებში გახლდათ ტაჯიკეთის რესპუბლიკის ნავთობ-საძიებო კომპანიის Skyland Petroleum Group საოპერაციო დირექტორი; 2017 წლიდან კი, კომპანია Avenue Construction Georgia-ის დირექტორი. მიხეილ ნინუა მინისტრის მოადგილის რანგში საქმიანობას 2018 წლის 5 ნოემბრიდან შეუდგება.