დღეს თბილისის კანცელარიასთან გამართულ აქციაზე თეთრი ხმაურის მოძრაობამ კიდევ ერთხელ გააპროტესტა ნარკოპოლიტიკა და მისი შედეგები.

აქტივისტები დემურ სტურუას თვითმკვლელობის საქმეზე საქართველოს პრემიერ მინისტრს, გიორგი კვირიკაშვილს, მიმართავენ:

საქართველოში მოქმედმა რეპრესიულმა ნარკოპოლიტიკამ კიდევ ერთი უდანაშაულო ადამიანი იმსხვერპლა. 22 წლის დემურ სტურუას ფიზიკური და ფსიქოლოგიური ძალადობის გამოყენებით აიძულებდნენ პოლიციასთან თანამშრომლობას და თანასოფლელების დასმენას, რამაც სტურუა თვითმკვლელობამდე მიიყვანა.

სახელმწიფოს მიერ განხორციელებული ნარკოპოლიტიკის შედეგები უამრავმა ადამიანმა იწვნია საკუთარ თავზე. მისი ყოველდღიური პრაქტიკების დიდი ნაწილი ისევ უხილავი ქსელების მეშვეობით ფუნქციონირებს. ამგვარი ძალადობრივი ქსელების მუშაობის წინაპირობას წლების განმავლობაში პოლიციისთვის მიცემული გადაჭარბებული ძალაუფლება ქმნის, რომლის საზოგადოებრივი კონტროლის მექანიზმები დღემდე არ არსებობს. სამტრედიაში დატრიალებული ტრაგედია ამ სტრატეგიის ყველაზე უკიდურესი გამოვლინებაა. ჩვენ ჯერ კიდევ ვერ ვხედავთ პოლიციური ძალადობის სრულ სურათს და მის სავალალო შედეგებს, სწორედ ამიტომ, მომხდარი ძალადობის ფაქტი ჩვენი მხრიდან მკაცრ რეაგირებას მოითხოვს.

ამასთანავე უნდა აღინიშნოს, რომ მოქმედი ნარკოპოლიტიკის მიზანმიმართული შეტევა საზოგადოების ყველაზე მოწყვლად ფენებზე მიმდინარეობს, რაც საქართველოში არსებული დრამატული სოციალური უთანასწორობის უშუალო შედეგია. მომხდარი დანაშაული კიდევ ერთხელ გვარწმუნებს, რომ პოლიციური კონტროლის მექანიზმები საჯარო სივრცის მიღმა დარჩენილ, ხმაწართმეულ ადამიანებს განსაკუთრებული სიმკაცრით უსწორდება, მისი მოქმედების ძირითად სივრცეებს რეგიონები, სოფლები და გარეუბნები წარმოადგენენ.

თეთრი ხმაურის მოძრაობა უერთდება დემურ სტურუას ოჯახის მოთხოვნებს, რომლებიც შემდგომში მდგომარეობს:

  1. პასუხისმგებლობაში მიეცეს პოლიციელი გოდერძი თევზაძე და მისი მეწყვილე, რომლის ვინაობასაც პოლიცია ამ დრომდე ასაიდუმლოებს.
  2. თანამდებობა დატოვოს სამტრედიის რაიონული პოლიციის უფროსმა.
  3. შსს-ს მინისტრმა საზოგადოებრივი ორგანიზეციების თანამონაწილეობით შექმნას მონიტორინგის ჯგუფი, რომელიც თბილისსა და რეგიონებში პოლიციის მხრიდან ძალის გადამეტებისა და შანტაჟის პრაქტიკებს შეისწავლის.
  4. დაუყოვნებლივ გადაიდგას ქმედითი ნაბიჯები რეპრესიული ნარკოპოლიტიკის შესაცვლელად.

თეთრი ხმაურის მოძრაობა.

თეთრი ხმაურის მოძრაობა და აქციის მონაწილეები მოგვიანებით სამტრედიაში გადაინაცვლებენ და პოლიციის შენობის წინ გამართავენ მთავარ აქციას.