აჭარის ტელევიზიის წამყვანი, მომღერალი სოფო ხალვაში, რომელიც სალომე ზურაბიშვილის კამპანიაში მონაწილეობდა, უარყოფს, რომ რუსეთში კონცერტზე მიდის. ამის შესახებ ხალვაშმა ფეისბუქგვერდზე დაპოსტა.

"ჯერ მომღერლებთან გადაემოწმებინათ", — განუცხადა On.ge-ს ხალვაშმა. მისი თქმით, ამ კონცერტზე სიაში მითითებული არც ერთი ქართველი მომღერალი არ მიდის და ინფორმაცია არაზუსტია. ხალვაშმა განაცხადა, რომ დამატებით დეტალებზე საუბარი არ სურს.

გუშინ, 27 ოქტომბერს, რამდენიმე მედიასაშუალებამ გაავრცელა ინფორმაცია, რომ რუსეთში ქართული მუსიკის საღამო იმართებოდა, რომელზეც საქართველოდან შემსრულებლები მიდიოდნენ. მედიები ეყრდნობოდნენ Vegas City Hall-ის მიერ გამოქვეყნებულ ღონისძიების აფიშას.

ფოტო: Vegas-Hall

აფიშაზე წერია, რომ 13 ნოემბერს მოსკოვში სოფო ხალვაში, მერაბ სეფაშვილი, ანრი ჯოხაძე, ლაშა ღლონტი, ნინო ჩხეიძე, სოსო პავლიაშვილი, თამარ გვერდწითელი, ქართული ხმები და სხვა მომღერლები იმღერებენ.

On.ge ცდილობს სხვა შემსრულებლებთან ინფორმაციის გადამოწმებას.