მზად ვართ თავდებში ჩავუდგეთ ზაზა სარალიძეს - ევროპული საქართველო სარალიძის დაუყოვნებლივ გათავისუფლების მოთხოვნით შინაგან საქმეთა მინისტრს მიმართავს.

პარტიაში მოუწოდებენ გახარიას გაითვალისწინოს საპარლამენტო უმცირესობის თავდებობა. პარტიის საპრეზიდენტო კანდიდატის, დავით ბაქრაძის განცხადებით, ოჯახთან და ადვოკატებთან ერთად თავდებობას დოკუმენტური წესით გააფორმებენ.

ზაზა სარალიძე გუშინ, 26 ოქტომბერს პოლიციელზე სამსახურეობრივი მოვალეობის შესრულების დროს თავდასხმის ბრალდებით დააკავეს. სარალიძემ სამართალდამცავის მიმართ აგრესია მას შემდეგ გამოხატა, რაც მას კარვის გაშლის უფლება არ მისცეს. ამ უფლებას სარალიძეს უკვე რამდენიმე თვეა უზღუდავენ.

სარალიძის ადვოკატი, ნესტან ლონდარიძე აცხადებს, რომ მის მიმართ საქმე არასწორი მუხლით არის აღძრული. ლონდარიძის თქმით, სარალიძე პოლიციელს სამსახურეობრივი მოვალეობის შესრულების დროს არ დასხმია თავს, ვინაიდან პოლიციელი ამ დროს კარავს შლიდა, რაც უკანონობაა და მის კომპეტენციაში არ შედის.