"გამოვრთე რუსთავი 2 და, ჰოი, საოცრებავ, ლარი 1,65-ად მომეჩვენა", — ასე გამოეხმაურა ნაციონალური მოძრაობის წევრი, რომან გოცირიძე ქართული ოცნების თავმჯდომარის, ბიძინა ივანიშვილის ინტერვიუს, სადაც ის რუსთავი 2-ს აკრიტიკებდა.

გოცირიძემ სხვა მსგავსი ფეისბუქპოსტიც გამოაქვეყნა, სადაც ის წერს:

"ამ დილით გამოვრთე რუსთავი 2, მივირთვი უმი ხახვი და გემრიელ მწვადად მომეჩვენა".

გუშინ, 23 ოქტომბერს სამი ჟურნალისტისთვის მიცემულ ინტერვიუში ივანიშვილმა განაცხადა, რომ "რუსთავი 2-ის გამორთვით ქვეყანაში აღმავლობის მეტს ვერაფერს ვნახავთ".

ივანიშვილმა ინტერვიუს დროს, ორი საათისა და ოცი წუთის განმავლობაში ტელეკომპანია რუსთავი 2 მინიმუმ 40-ჯერ ახსენა.

ივანიშვილმა რუსთავი 2 მატყუარად და ნაციონალური მოძრაობის იდეების გამტარებლად, ჟურნალისტები კი არაპროფესიონალებად მოიხსენია. მისი თქმით, არხის კრიტიკული სიუჟეტები მიკერძოებულად არის გაშუქებული.