27 ოქტომბრიდან 4 ნოემბრამდე აბრეშუმის სახელმწიფო მუზეუმი გამართავს უნიკალურ ფესტივალს, მეხსიერების ძაფები: მუზეუმი და სამეზობლო. ფესტივალი შეეხება მუზეუმებისა და სამეზობლოების კავშირს, კერძოდ, იმ განსაკუთრებულ ისტორიასა და შრეებს, რომელიც აბრეშუმის მუზეუმს გააჩნია მის ირგვლივ არსებულ ტერიტორიებთან მიმართებაში.

ამ ტერიტორიაზე განთავსებული იყო კავკასიის მეაბრეშუმეობის სადგურის მრავალი შენობა, აბრეშუმის ჭიების გამოკვების მიზნით დარგული თუთის ხეები სამეზობლოშია მიმოფანტული, ამ ნაგებობებიდან მუზეუმისთვის აშენებული შენობა ერთადერთია, რომელიც თავდაპირველ ფუნქციას ინარჩუნებს და ინახავს შემოგარენის მეხსიერებას.

მიუხედავად ამისა, დღეს მუზეუმის ცხოვრებაში სამეზობლოს ჩართულობა და კავშირი საკმაოდ მცირეა. ფესტივალის ხაზი მიუყვება ნამუშევრებს და ღონისძიებებს მუზეუმის შენობაში, მის გარე სივრცეებსა და შემოგარენში, ან კერძო სივრცეებში და იწვევს მეზობლებს, რომ ჩაერთონ ამ ღონისძიებებში და დაუკავშირდნენ მუზეუმს.

მსგავსი მიდგომით, ფესტივალი ასევე განიხილავს საჯარო სივრცისა და მისი პრივატიზაციის საკითხებს თბილისში, რაც უკანასკნელ ათწლეულებში საკმაოდ პრობლემურად იქცა - საჯარო სივრცეები ნელ-ნელა ქრება, შესაბამისად, შევეცდებით განვიხილოთ, თუ რა როლი შეიძლება ჰქონდეს ხელოვნების და კულტურის სფეროს დაწესებულებებს ამ საკითხის კრიტიკულ გადააზრებაში.

ფესტივალი არის წინგადადგმული ნაბიჯი იმ შეკითხვებზე პასუხის გასაცემად, რომლებსაც აბრეშუმის მუზეუმი, როგორც კულტურის სფეროს დაწესებულება, უსვამს საკუთარ თავს - რა ცოდნას ინახავს მუზეუმი თავისი შემოგარენის შესახებ, რა სახის ახალი ისტორიების შეგროვება და შენახვა შეუძლია მას სამეზობლოსთან დაკავშირებით? რა როლი შეიძლება ჰქონდეს მას სამეზობლოში?

ფესტივალის ფარგლებში გამოცხადდა ღია მიღება მონაწილეობაზე, როგორც უცხოელი, ისე ადგილობრივი ხელოვანებისთვის. ის აერთიანებს სპეციალურად ფესტივალისთვის შექმნილ ათ სხვადასხვა სახის ნამუშევარს, რომლებიც პასუხობს აბრეშუმის მუზეუმისა და მისი სამეზობლოს საკითხს. ასევე, ფესტივალის ფარგლებში გაიმართება მოძრაობის თეატრის პერფორმანსი, გასვლითი ტურები, საგანმანათლებლო პროგრამა მოსწავლე გიდი და სუვენირების დამზადების ვორქშოფები.

ფესტივალის კურატორები არიან ნინო (ჩუკა) კუპრავა, ნინი ფალავანდიშვილი, მარიამ შერგელაშვილი და დათა ჭიღოლაშვილი.

ნამუშევრების ავტორები არიან თამარ ბოჭორიშვილი და ნაილი ვახანია, ელენე გაბრიჩიძე და ონო დირკერი, გიორგი დანიბეგაშვილი, დანა ისკაკოვა, არინა კაზაკი, ლეილა მუსაიევა, დიანა უხინა, ანნა ფარქოსაძე, კატარინა შტადლერი, მიტია ჩურიკოვი.

საგანმანათლებლო პროგრამის „მოსწავლე გიდი“ კოორდინატორები არიან მარიამ გოჩელაშვილი და თინათინ ყიფიანი.

ფესტივალი პროექტ Art Prospect-ის ნაწილია, რომელსაც მხარს უჭერს ორგანიზაცია CEC ArtsLink.