აზერბაიჯანის გენერალური პროკურატურის ცნობით, ქვეყანაში ამერიკაში მცხოვრები სასულიერო პირის, ფეტულა გიუელენის მხარდამჭერების წინააღმდეგ გამოძიება დაიწყო. ინფორმაციას ამის შესახებ Ekhokavkaza Interfax-ზე დაყრდნობით ავრცელებს.

როგორც ადგილობრივი პროკურატურის წარმომდგენელი, ელდარ სულტანოვი განმარტავს, საგამოძიებო უწყებამ აღნიშნული გადაწყვეტილება ქვეყანაში შესაძლო უკანონო ქმედებების აღმოსაფხვრელად იმ პირთა წინააღმდეგ მიიღო, რომლებიც თურქეთის მიერ ქვეყანაში სახელმწიფო გადატრიალების მოწყობის მცდელობაში დადანაშაულებულ პირს, გიულენს უჭერენ მხარს.

15 აგვისტოს ადგილობრივი მედიასაშუალებები ასევე ავრცელებდნენ ინფორმაციას, რომ გიულენის მოკავშირე აზერბაიჯანში ოპოზიციური პარტია - სახალხო ფრონტის მეთაური, ალი კერიმლია.

სულტანოვი განმარტავს, რომ ეჭვი იმასთან დაკავშირებით, რომ სწორედ კერიმლი იყო გიულენის მოკავშირე აზერბაიჯანში, ჯერ კიდევ 2014 წელს გაჩნდა:

"კომპეტენტურ წყაროებზე დაყრდნობით, გამოძიებამ კერიმლისა და გიულენის ფინანსური პირამიდის მეთაურის, მურატ კილიჩლის შორის კავშირი აღმოაჩინა. წყარო ასევე ამბობს, რომ კერიმლის კილიჩლისგან დაფინანსებას იღებდა".

15 ივლისს თურქეთში, ხელისუფლების დამხობის მიზნით, ქვეყნის რამდენიმე ლოკაციაზე შეიარაღებული დაჯგუფების თავდასხმას 300-მდე ადამიანის სიცოცხლე ემსხვერპლა, აჯანყებასთან კავშირის ბრალდებით თანამდებობიდან გადააყენეს და დააკავეს ათასობით მოსამართლე, მაღალი თანამდებობაზე მყოფი სამხედროები, პოლიციელები და სამოქალაქო პირები.

გარდა ამისა, დახურულია 130-მდე მედიასაშუალება, დაკავებულები არიან ჟურნალისტები. ქვეყანაში სამთვიანი საგანგებო მდგომარეობაა გამოცხადებული.

მომხდარში თურქეთის ხელისუფლება ამერიკაში მცხოვრებ სასულიერო პირს, ფეტულა გიულენს ადანაშაულებს, რომელიც ქვეყნის პრეზიდენტის ძველი მოკავშირე, ახლა კი მისი მტერია.

თურქეთში მომხდარი ამბოხის გამომწვევი მიზეზების, მისი ორგანიზატორებისა და მომხდარის შესახებ დეტალურ ინფორმაციას შეგიძლიათ გაეცნოთ აქ: