საქართველოს პარლამენტის თავმჯდომარემ, ირაკლი კობახიძემ ტელეკომპანია რუსთავი 2-ის ეთერში თემირლან მაჩალიკაშვილის სპეცოპერაციის შედეგად გარდაცვალების საქმეზე დასმულ კითხვებს არ უპასუხა. ამის მიუხედავად, ის ამტკიცებდა, რომ ამ საკითხზე პასუხი ამომწურავად გასცა.

მაშინ, როცა ჟურნალისტი მაჩალიკაშვილის საქმის დეტალების გამოვლენასთან დაკავშირებით დაინტერესდა, კობახიძემ ნაციონალური მოძრაობაზე დაიწყო საუბარი:

"ყველა კითხვას გაეცემა პასუხი. ყველა კითხვას გაეცემა პასუხი. ყველა კითხვას გაეცემა პასუხი. რაც შეეხება ნაცმოძრაობას... არა, არა, ლოგიკას დააკვირდით, მე რატომ ვამბობ რაღაცებს. ნაცმოძრაობა არის პოლიტიკური ძალა, რომელიც... დღესაც თავში უნდა ჩავარტყათ, თავი წამოყეს და თავში უნდა ჩავარტყათ საზოგადოებასთან ერთად".

პარლამენტის თავმჯდომარე ამტკიცებდა, რომ ჟურნალისტის მიერ დასმულ კითხვას პასუხი გასცა, თუმცა, გადაცემის წამყვანის თხოვნა, ნათქვამი ისევ გაემეორებინა, უშედეგო აღმოჩნდა.

19 წლის თემირლან მაჩალიკაშვილი 2017 წელს პანკისში ჩატარებული სპეცოპერაციის შედეგად გარდაიცვალა. სახელმწიფო უსაფრთხოების სამსახური პანკისში ტერორიზმის საქმეზე ატარებდა სპეცოპერაციას, თემირლან მაჩალიკაშვილის მამა, მალხაზ მაჩალიკაშვილი კი შვილის ტერორიზმთან კავშირს გამორიცხავს, საქმის გამოძიებას და მისი შვილის მკვლელობაში მონაწილე პირების დასჯას ითხოვს.