საქართველოს ფეხბურთის ფედერაციის პრეზიდენტი, ლევან კობიაშვილი მოუწოდებს გულშემატკივრებს, საქართველო-ლატვიის საფეხბურთო მატჩზე, რომელიც დღეს, 9 სექტემბერს, 20:00 საათზე გაიმართება, დაიცვან წესრიგი.

"ამ თამაშს ჰყავს თავისი დელეგატი, აქედან გამომდინარე ნებისმიერი არასპორტული საქციელი რომელმაც შესაძლოა რაიმე სახის ნეგატივი გამოიწვიოს, შეიძლება ძალიან მკაცრად იყოს შეფასებული, თუ რამე ქმედება ხდება ტრიბუნაზე შეუძლია მას [დელეგატს] თამაშის ჩაშლა, თამაშის შეწყვეტა. რომელიც იქნება კატასტროფა", — ამბობს კობიაშვილი.

დღეს გასამართ მატჩზე მოქალაქეთა ნაწილი გურამ კაშიას მხარდასაჭერად მიდის, მეორე ნაწილი კი, ჰომოფობიური და ქსენოფობიური იდეების მატარებელი გაერთიანების, ქართული მარშის ორგანიზებით იკრიბება, მათ ფეხბურთელის წინააღმდეგ პროტესტის გამოხატვა სურთ.

შინაგან საქმეთა სამინისტროს ინფორმაცით, დღეს, 9 სექტემბერს დინამო არენასთან დაგეგმილი აქციის დროს გამოხატვის თავისუფლების ჩარჩოების გადაცდომებს უმკაცრესი რეაგირება მოჰყვება. ამ შინაარსის განცხადება უწყებამ მატჩის დაწყებამდე რამდენიმე საათით ადრე გაავრცელა.