კომპანია "ყაზტრანსგაზ-თბილისი" ბეჭდურ ქვითრებს ელექტრონულით სრულად ჩაანაცვლებს. მომხმარებლები ქვითარს როგორც მობილურ ტელეფონებზე ტექსტური შეტყობინებით, ისე ელექტრონული ფოსტის საშუალებით მიიღებენ. ამის შესახებ კომპანიის მიერ გავრცელებულ განცხადებაში წერია.

ელექტრონულ რეჟიმზე გადასვლის შესახებ გადაწყვეტილება ძალაში დღეიდან, 3 სექტემბრიდან შედის და ის რამდენიმე ეტაპად განხორციელდება. პირველ ეტაპზე ცვლილება მხოლოდ მათთვის ამოქმედდება, ვინც მომსახურებაზე წერილობით თანხმობას განაცხადებს.

"ამ ეტაპზე ელექტრონული ქვითრებით მათივე თანხმობით დედაქალაქში 100 000-მდე აბონენტი ისარგებლებს", — წერია კომპანიის განცხადებაში.

"ყაზტრანსგაზ-თბილისი" მსგავსი ფორმით მომსახურებაზე სრულად გადასვლას წლის ბოლომდე გეგმავს. კომპანიაში ამბობენ, რომ ცვლილება აბონენტთა მომსახურების გაუმჯობესების მიზნით ხდება.

"მომსახურების ხარისხის გაუმჯობესებასთან ერთად მსგავსი მომსახურებით ქაღალდის უდიდესი ეკონომია მოხდება და ეს გადაწყვეტილება ეკოლოგიის მხრივაც ძალიან მნიშვნელოვანია", — ვკითხულობთ ყაზტრანსგაზის განცხადებაში.