"ყველა, ვისაც სპორტი გვიყვარს, ვისაც ფეხბურთი გვიყვარს, ვისაც ჩვენი ქვეყნის წინსვლა და განვითარება გაგვიხარდება, ყველა ადამიანი ვუდგავართ გურამს გვერდით და ველოდებით ეროვნულ ნაკრებში", - ასე გამოეხმაურა თბილისის მერი და საფეხბურთო ეროვნული ნაკრების ყოფილი კაპიტანი, კახა კალაძე გურამ კაშიას ირგვლივ განვითარებულ მოვლენებს. მერმა ამის შესახებ გუშინ, 30 აგვისტოს მედიატურის დროს განაცხადა.

კალაძის განმარტებით, კაშიას მიმართ ფსიქოლოგიური ზეწოლა და შეურაცხყოფა კატეგორიულად მიუღებელია:

"რომელ ქვეყანაშიც მუშაობდა გურამი, იმ ქვეყანაში მოხდა პოზიციის დაფიქსირება, იმ ფორმით, რა ფორმითაც მან ეს გააკეთა. თუმცა იმას, რასაც ბოლო დღეების განმავლობაში ვუსმენთ და ვუყურებთ, ჩემთვის კატეგორიულად მიუღებელია ამ ფორმით ფსიქოლოგიური ზეწოლა და შეურაცხყოფის მიყენება".

30 აგვისტოს UEFA-მ გურამ კაშიას #EqualGame-ის ჯილდო გადასცა. დაჯილდოების ცერემონიაზე წამყვანმა ისაუბრა იმაზე, რომ ჯილდო კაშიამ ლგბტ თემის მხარდაჭერისთვის მიიღო. მან აღნიშნა, რომ კაშიას ლგბტ სამკლაურით თამაშს საქართველოში კრიტიკა მოჰყვა, მაგრამ ფეხბურთელმა უკან არ დაიხია და განაცხადა, რომ თანასწორობის უფლებას დაიცავს.

გურამ კაშიას ჯილდო ლევან კობიაშვილმა აიღო, რადგან კაშია დაჯილდოების ცერემონიას თამაშის გამო ვერ დაესწრო. ცერემონიაზე კაშიას ვიდეო გაუშვეს, სადაც მან მადლობა გადაუხადა უეფას ჯილდოსთვის.

გასული წლის ოქტომბერში, კაშიამ მატჩისას ხელზე ლგბტ დროშის ფერებში სამკლაური გაიკეთა, რაც ცნობიერების ამაღლების კამპანიის ნაწილია. მისი ფოტოს გამოჩენამ, ქართველი მომხმარებლების ნაწილი გააღიზიანა. კაშიამ განაცხადა, რომ ძალადობის წინააღმდეგია და არ ნანობს რაც გააკეთა.

მოგვიანებით, ონლაინ ბულინგის გამო ფეხბურთელმა ფეისბუქის ვერიფიცირებული გვერდი გააუქმა და ინსტაგრამის ანგარიში დახურა. სოციალური ქსელის მომხმარებლები მის მხარდაჭერად გაერთიანდნენ და კამპანია #გურამშენთანვარ დაიწყეს.

კაშიას მხარდაჭერა გამოუცხადა ფეხბურთის ფედერაციამ, თანაგუნდელებმა, ომგუდმსნემა პოლიტიკოსებმა, ჟურნალისტებმა და სხვადასხვა აქტივისტებმა.

თუმცა ამავე მიზეზით, ჰომოფობიურ ნიადაგზე კაშიას მიმართ მუქარისბრალდები გაგრძელდა. ულტრამემარჯვენე ჯგუფები 9 აპრილს ნაკრების თამაშზე კაშიას წინააღმდეგ საპროტესტო აქციას გეგმავენ. თამაშზევე გაიმართება ფეხბურთელის მხარდამჭერი აქციაც.