საქართველოს პრეზიდენტმა, გიორგი მარგველაშვილმა დღეს, მუხათგვერდის ძმათა სასაფლაოზე ყოფნისას 2008 წელს დაღუპულ გმირებზე ისაუბრა: "მათი გმირობა ჩვენ დღესაც წელში გვმართავს და გვაძლევს მომავლის იმედს. ერთი არის რეალობა, რომ რუსეთი ვერასდროს ვერ გაექცევა იმ უსამართლობას, რაც ჩაიდინა მისი მეზობელი ერის წინააღმდეგ".

2008 წლის აგვისტოს ომიდან 8 წლის თავზე, 8 აგვისტოს, დილიდან მუხათგვერდის ძმათა სასაფლაოზე, დაღუპულთა ხსოვნის პატივსაცემად, შეკრება დაიწყეს პოლიტიკოსებმა, მთავრობის წარმომადგენლებმა და გარდაცვლილთა ნათესავებმა. პრეზიდენტმა განაცხადა, რომ ოკუპაცია და საქართველოს ტერიტორიაზე თითქოსდა დამოუკიდებელი სახელმწიფოების აღიარება იქნება ის პრობლემა, რომელიც რუსეთს მუდმივად წინ აღუდგება. პრეზიდენტის თქმით, რუსეთმა როგორც ბირთვულმა სახელმწიფომ, დიდი შეცდომა დაუშვა მეზობელი, მცირე ერის მიმართ სამხედრო აგრესიის განხორციელებისას და ეს შავი ლაქა მუდმივად თან გაჰყვება.

"ჩვენ ნამდვილად დავიბრუნებთ და არა ომით, არამედ შერიგებით გავამთლიანებთ საქართველოს, მაგრამ რუსეთს მუდმივად ექნება პასუხი გასაცემი იმაზე რანაირად გადადგა ასეთი სისხლიანი ნაბიჯი თავისი მეზობელი, მცირე ერის წინააღმდეგ."

2008 წლის აგვისტოს რუსეთ-საქართველოს ომში საქართველოს თავდაცვის სამინისტროს 170 მოსამსახურე, შინაგან საქმეთა სამინისტროს 14 თანამშრომელი და 224 სამოქალაქო პირი დაიღუპა.

ჯანდაცვის სამინისტროს მონაცემებით, დაჭრილ/დაშავებულ სამოქალაქო და სამხედრო პირთა რაოდენობა სულ 2 232 პირს შეადგენს. მათ შორის, 1045 სამხედრო მოსამსახურე იყო.