ორშაბათს, 4 აპრილს, საბერძნეთიდან დეპორტირებული მიგრანტები თურქეთში ჩავიდნენ. ინფორმაციას BBC ავრცელებს.

დეპორტაციას ევროკავშირის თურქეთთან შეთანხმება უძღვოდა წინ, რომლის მიხედვითაც ქვეყანას უკან უნდა მიეღო ყველა არალეგალი მიგრანტი, რომლებიც 20 მარტის შემდეგ თურქეთიდან საბერძნეთში ჩავიდნენ.

მცირე ზომის თურქულმა ბორანმა და მოზრდილმა კატამარანმა 131 მიგრანტი, მათ შორის ზოგი პაკისტანიდან და ზოგი ბანგლადეშიდან, საბერძნეთის შემადგენლობაში მყოფ ლესბოსის კუნძულიდან გაიყვანა.

მიგრანტების გადაყვანის პროცესს ესწრებოდა ევროკავშირის სასაზღვრო ორგანიზაცია Frontex-ის წარმომადგენელიც. ადგილზე მობილიზებული იყო პოლიცია, თუმცა ფრონტექსის წარმომადგენლის თქმით, პროცედურამ წესის მიხედვით ჩაიარა.

საბერძნეთის ხელისუფლების წარმომადგენლების თქმით, მიგრანტები ევროპის სხვადასხვა ქვეყანაში თურქეთიდან გადავიდნენ.