მას შემდეგ, რაც ძლიერი წვიმისა და სეტყვის გამო ბორჯომში ქუჩები და სახლები დაიტბორა, ტურისტული ზონებიდან ხალხის ევაკუაცია განხორციელდა. ინფორმაციას ინტერპრესნიუსი ბორჯომის მუნიციპალიტეტის გამგებლის, დიმიტრი ყიფიანის ცნობაზე დაყრდნობით ავრცელებს.

ძლიერი წვიმის შედეგად ბორჯომის ქუჩები დაიტბორა, 4 აგვისტო, 2016.

ფოტო: იმედი

როგორ ყიფიანმა განაცხადა, გუბერნატორის ხელმძღვანელობით შექმნილია შტაბი და საგზაო და ადგილობრივი ტექნიკაა გამოყვანილი. მისი თქმით, ახალციხიდან რამდენიმე ერთეული ტექნიკა და სამაშველო სამსახურია მობილიზებული:

"ამ ეტაპზე ცენტრალური მაგისტრალი გახსნილია. ქალაქ ბორჯომში სანიაღვრეებმა მთლიანად გაატარა წყალი და მიმდინარეობს დასუფთავების სამუშაოები. სერიოზული დაზიანებებია ისტორიულ პარკში, თუმცა დამსვენებლების ევაკუაცია დროულად მოხერხდა. ასევე მძიმე მდგომარეობა იყო გოგირდის აბანოებზე, სადაც რამდენიმე ათეული დამსვენებელი იმყოფებოდა და ამ ადგილიდან ჩვენი პოლიციის ძალიან დიდი ძალისხმევით ხდება ხალხის გამოყვანა".

ყიფიანმა ასევე განმარტა, რომ მობილიზებულია სამაშველო სამსახური, სახანძრო, საპატრულო პოლიცია:

"სიტუაცია პრობლემატურია სადგურის მიმართულებით, სადაც რამდენიმე ხეა მოტეხილი და იქაც სატყეო დეპარტამენტი და პოლიცია აქტიურად მუშაობს. წაღვერშიც იყო დიდი სტიქია და იქაც 4 ერთეული ტექნიკა მუშაობს და მიმდინარეობს გზის გაწმენდა. ვიმედოვნებთ, რომ წაღვერის მაგისტრალი, რომელიც უკავშირდება ბაკურიანს, ძალიან მალე გაიხსნება"

ძლიერი წვიმა და სეტყვა ბორჯომის მუნიციპალიტეტში დაახლოებით ნახევარ საათს გაგრძელდა, რის შედეგადაც ბორჯომის ქუჩები და სახლების პირველი სართულები დაიტბორა. აღნიშნულის გამო შეწყდა ელექტროენერგიის მიწოდებაც.