პოლონეთის საგარეო საქმეთა მინისტრმა, იაცეკ ჩაპუტოვიჩმა რუსეთ-საქართველოს ომთან დაკავშირებით გამართულ შეხვედრაზე თქვა, რომ პოლიტიკური რეაქციის ნაკლებობამ გააძლიერა რუსეთის ქმედებები:

"2008 წლიდან დაწყებული რუსეთი ღიად იყენებს სამხედრო ინსტრუმენტებს თავისი პოლიტიკური მიზნების მისაღწევად".

მინისტრმა აღნიშნა, რომ პოლონეთი გამოიყენებს საერთაშორისო ფორუმებს, რათა რუსეთის აგრესიისგან გამოწვეული ყველა ქმედება დღის წესრიგში იდგეს:

"არ არსებობს კონფლიქტის მოგვარების უკეთესი გზა, ვიდრე მშვიდობიანი მოლაპარაკებები, პრევენციული ძალისხმევა, პარტნიორების ჩართვა, პოლიტიკური დაგმობა აგრესიული ქმედებებისა და ეკონომიკური სანქციები, რაც საბოლოოდ საჭირო და აუცილებელია".

იაცეკ ჩაპუტოვიჩის თქმით, საერთაშორისო თანამეგობრობა ვალდებულია თავის ფასეულობებზე დაყრდნობით, რეაგირება მოახდინოს და გამოიყენოს მექანიზმები:

"პოლონეთი მზადაა და მოვუწოდებთ ჩვენს პარტნიორებს ვიყოთ ერთად და ჩვენ იმედი გვაქვს შესაძლებელი იქნება მშვიდობიანი თანაარსებობის ჩამოყალიბება".

დღეს, 7 აგვისტოს, საგარეო საქმეთა სამინისტროს ორგანიზებით, მრგვალი მაგიდის ფორმატის შეხვედრა თბილისის პარლამენტის შენობაში გაიმართა.