ბათუმის საერთაშორისო აეროპორტმა შესაძლოა ადგილმდებარეობა შეიცვალოს. ამის შესახებ ინფორმაცია პირველად საზოგადოებრივი მაუწყებლის აჭარის ტელევიზიამ გაავრცელა. მსგავსი იდეით აჭარის უმაღლეს საბჭოს დეპუტატმა, ცოტნე ანანიძემ მიმართა.

ანანიძის თქმით, აეროპორტი შუა ქალაქშია განთავსებული და ეს, შესაძლოა, საინვესტიციოდ ხელს უშლიდეს ამ ზოლის განვითარებას.

"ამაზე ფიქრი და მსჯელობა გამიჩნდა აეროპორტის დასახლებაში ადგილობრივ მოსახლეობასთან საუბრის დროს. როგორც მე მითხრეს, აქვთ დისკომფორტი იმიტომ, რომ აეროპორტი არის შუა ქალაქში", - ამბობს დეპუტატი On.ge-სთან საუბრისას.

მისივე აზრით, თუ აეროპორტი ქობულეთში გადავა, ეს ხელს შეუწყობს როგორც ბათუმის, ისე ქობულეთის განვითარებას. ანანიძემ, ასევე, დაამატა, რომ ამ საკითხის გარშემო მსჯელობაა საჭირო.

აჭარის უმაღლესი საბჭოს თავმჯდომარემ, თორნიკე რიჟვაძემ აჭარის ტელევიზიასთან განმარტა, რომ კონცეპტუალურად საკითხი დაყენებულია და ტექნიკურ-ეკონომიკური შესწავლის შემდეგ შესაბამის გადაწყვეტილებას მიიღებენ.