საქართველოს განათლების, მეცნიერების, სპორტისა და კულტურის მინისტრობის კანდიდატის მიხეილ ბატიაშვილის განცხადებით, ციფრული ეკონომიკის ერაში ციფრული სკოლის კონცეფციის განვითარებაა საჭირო.

მინისტრობის კანდიდატის თქმით, ციფრული სკოლის კონცეფცია სწავლების პროცესში ტექნოლოგიური საშუალებების გამოყენებას გულისხმობს.

"ჩვენ თუ გვინდა მოკლე დროში გარკვეული ნაბიჯები გადავდგათ, მნიშვნელოვანი ფაქტორი ტექნოლოგიები უნდა იყოს. ციფრული სკოლა იდეალური სკოლის კონცეფცია უნდა იყოს", - განაცხადა მიხეილ ბატიაშვილმა.

ბატიაშვილის თქმით, პლანშეტებსა და კომპიუტერებს არ უნდა ებრძოლონ, პირიქით, სკოლებში უნდა დაარიგონ.

"სკოლებში ტექნოლოგიების მიმართულება უნდა გავაძლიეროთ, ამას ალტერნატივა არ აქვს, თუ გვინდა მივაღწიოთ ციფრული ზრდის მოდელს", - განაცხადა მიხეილ ბატიაშვილმა.

პარლამენტში მთავრობის განახლებულ შემადგენლობას ფრაქციების, კომიტეტების, უმრავლესობის და უმცირესობის ფორმატებში უსმენენ.

14 ივლისს, პარლამენტის რიგგარეშე სხდომა გაიმართება, სადაც მთავრობისთვის ნდობის გამოცხადების საკითხი განიხილება.