უბედური შემთხვევები ხშირად ხდება და მიუხედავად იმისა, რომ მათი თავიდან არიდება რთულია, ცუდი სიტუაციებისთვის მომზადება წინასწარ ნამდვილად შეგვიძლია.

ხანძარი ერთ-ერთი ყველაზე ცუდი რამაა, რაც სახლს და ოჯახს შეიძლება შეემთხვეს. თითქმის წარმოუდგენელიც კია, ამ საშინელ ამბავს დანაკარგისა და ფინანსური ზარალის გარეშე გადაურჩე, თუმცა მთავარი, რაც ცეცხლის გაჩენის მომენტში უნდა გახსოვდეთ ისაა, რომ ადამიანის სიცოცხლეზე ძვირფასი არაფერია.

ადგილიდან გამოღწევა

თუ კვამლს შეამჩნევთ, პირველი, რაც უნდა მოიმოქმედოთ, განგაშის ატეხვაა. იყვირეთ ხმამაღლა და გააგებინეთ ყველას, რადგან ხანდახან ყველაფერს წამები წყვეტს. დარეკეთ 112-ზე და ეცადეთ, შენობიდან გარეთ გახვიდეთ. თუ კარის სახელური შეხებისას ცხელი მოგეჩვენებათ, კარს ნუ გაააღებთ. იპოვეთ სხვა გასასვლელი, მაგალითად, ფანჯარა. თუ კარის სახელური ცივია, გახსენით ნელა და გახოხდით იატაკზე.

ქვემოთ დახრა ან გახოხება უმნიშვნელოვანესია, რადგან ადამიანებს ხშირად ცეცხლისგან დამწვრობა კი არა, კვამლის შესუნთქვა კლავთ. გარდა ამისა, იატაკთან ახლოს ტემპერატურაც დაბალია. თუ დრო გაქვთ, დაიფარეთ მთელი სხეული სქელი ტანსაცმლით და აიფარეთ სველი ნაჭერი პირზე.

მნიშვნელოვანი ინფორმაცია:
თუ სიტუაცია იმდენად მწვავეა, რომ გაღწევას ვერ ახერხებთ, ამოქოლეთ კარის ღრიჭოები პირსახოცით ან ტანსაცმლით.

არ დაკარგოთ დრო

მთავარი შეცდომა, რასაც ადამიანები უშვებენ, ნივთების შეგროვებაში დროის დაკარგვაა. სახლი შეიძლება რამდენიმე წუთში დაიწვას, თქვენ კი შიგნით ხაფანგში გამომწყვდეული აღმოჩნდეთ.

თუ ფულზე თუ ძვირფასეულობაზე ღელავთ, მარტივი და ბანალური გამოსავალი სეიფის ქონაა.

შეუთანხმდით ოჯახის წევრებს სამოქმედო გეგმაზე

წესებზე შესათანხმებლად ხანძრის შემთხვევაში დრო არ გექნებათ, ასე რომ, ეს წინასწარ, სრულიად ჩვეულებრივ დღეებში უნდა გააკეთოთ. დაელაპარაკეთ ოჯახის წევრებს წარმოსახვით ხანძარზე, რომლის დროსაც ყველამ მობილიზებულად უნდა იმოქმედოს. რა გზები არსებობს ევაკუაციისთვის? სად უნდა შეხვდეთ მას შემდეგ, რაც ყოველი თქვენგანი გამოაღწევს ცეცხლმოდებული სახლიდან? გაითვალისწინეთ, რომ არაფერია იმაზე სახიფათო, ვიდრე შენობაში თავიდან შებრუნება. თუ იცით, რომ შენობიდან ვინმემ ვერ გამოაღწია, მიანდეთ ეს საქმე მეხანძრეებს.

აუცილებლად ასწავლეთ ბავშვებს, რომ საჭიროების შემთხვევაში 112-ზე დარეკონ და აუხსენით, როგორ უნდა მოიქცნენ საგანგებო სიტუაციებში.

აქვე შეგიძლიათ ნახოთ სხვა შუადღის დღევანდელი გადაცემა, სადაც სწორედ ხანძარზე ისაუბრეს.