ხორვატიის ნაკრების მცველი დომაგოი ვიდა FIFA-მ პროუკრაინული კომენტარის გამო გააფრთხილა. არსებობს საფრთხე, რომ იგი დისკვალიფიკაციით დაისაჯოს.

საქმე ისაა, რომ მსოფლიო ჩემპიონატის მეოთხედფინალში რუსეთთან მოპოვებული გამარჯვების შემდეგ უკრაინელმა ჟურნალისტმა ანდრეი შახოვმა გამოაქვეყნა ვიდეო, სადაც დომაგოი ვიდა და ყოფილი ხორვატი ფეხბურთელი ოგნენ ვუკოევიჩი გამარჯვებას უკრაინას უძღვნიან. ვიდეოში ისმის ფრაზა "დიდება უკრაინას", რომელიც განსაკუთრებით პოპულარული 2014 წელს რუსეთის ფედერაციის მიერ ყირიმის ანექსიის შემდეგ გახდა.

FIFA-ში ადასტურებენ, რომ მათ დომაგოი გააფრთხილეს.

არსებობს საფრთხე, რომ მას ტურნირის დარჩენილი შეხვედრების გამოტოვება მოუწიოს. დისციპლინარული კოდექსის თანახმად, "ნებისმიერი ფორმით გამოხატული პოლიტიკური ლოზუნგი" 2-მატჩიანი დისკვალიფიკაციით ისჯება. თუმცა აღსანიშნავია ისიც, რომ სასჯელის მინიმალური ზომა, შეიძლება, 5 000 დოლარითაც განისაზღვროს.

ხორვატიის ნაკრები თავის ნახევარფინალურ მატჩს ინგლისის წინააღმდეგ 11 ივლისს გამართავს.