ქართულ ოცნება - დემოკრატიულ საქართველოს მაჟორიტარი დეპუტატობის კანდიდატი მცხეთაში დიმიტრი ხუნდაძე იქნება, დუშეთსა და სტეფანწმინდაში კი – ზაქარია ქუცნაშვილი. მაჟორიტარები ისტორიულ ქალაქში დღეს, პრემიერმა გიორგი კვირიკაშვილმა წარადგინა.

კანდიდატთა წარდგენის გარდა, კვირიკაშვილმა სიტყვით გამოსვლისას მოსახლეობას მთავრობის მიერ 4 წლის განმავლობაში განხორციელებულ მნიშვნელოვან პროექტებზე მიაწოდა ინფორმაცია:

"რეაბილიტაცია ჩაუტარდა საერთაშორისო მნიშვნელობის საავტომობილო გზის, გუდაური-კობის მონაკვეთს; აშენდა და რეაბილიტაცია ჩაუტარდა მრავალ სხვა გზასა და ხიდს, სასმელი წყლის სისტემებს, სანიაღვრე და ნაპირსამაგრ სისტემებს, წყალმომარაგებისა და სარწყავ სისტემებს; აშენდა და განახლდა საბავშვო ბაღები, სკოლები; გამრიცხველიანდა და 30 ათასზე მეტ ოჯახს სტაბილურად მიეწოდება ელექტროენერგია".

პრემიერმინისტრმა რეგიონის სოფლებში გაზის შეყვანაზე გაამახვილა ყურადღება, ასევე, გლეხებისთვის განხორციელებულ პროგრამებსა და დარიალის ხეობაში სტიქიის პრევენციის მიზნით დამონტაჟებულ სასიგნალო სისტემაზე.

გიორგი კვირიკაშვილმა მცხეთელებთან შეხვედრისას მთის კანონის მნიშვნელობაზეც ისაუბრა:

"საქართველოსთვის მთა ბუნებრივი კარიბჭე და მცველია, იქ მცხოვრები თითოეული მოსახლე კი, ჩვენი სამშობლოს ნამდვილი მესაზღვრეა. ამიტომაც, მას განსაკუთრებული ყურადღება და პატრონობა სჭირდება ჩვენგან განსაკუთრებული ყურადღების შედეგად უნდა მივაღწიოთ იმას რომ მთაში დაბრუნდეს ძირძველი მოსახლეობა და რა თქმა უნდა - მთა არ უნდა დაცარიელდეს. მთის კანონის შემოღებით ჩვენ მნიშვნელოვანი დახმარება გავუწიეთ მთაში მცხოვრებ ჩვენს გმირ ხალხს“.

კვირიკაშვილი მოსახლეობას დაჰპირდა, რომ შემდეგ წლებში მთავრობა კიდევ უფრო მასშტაბურ პროექტებს განახორციელებს.