საქართველოს პრეზიდენტმა, გიორგი მარგველაშვილმა თურქეთის საპრეზიდენტო არჩევნებში რეჯეპ ტაიპ ერდოღანს გამარჯვება მიულოცა.

"თურქმა ხალხმა ხმა მისცა ქვეყნის შემდგომ განვითარებას, მშვიდობას, უსაფრთხოებასა და სტაბილურობას, რათა უზრუნველყონ სამომავლო კეთილდღეობა და წარმატება. ბოლო პერიოდის განმავლობაში, ჩვენ თქვენი ქვეყნის პოლიტიკური, ეკონომიკური და კულტურული წინსვლის მომსწრენი გავხდით. მწამს, რომ თქვენი ხელმძღვანელობის პერიოდში თურქეთის რესპუბლიკა წარმატებული განვითარებისათვის ახალ სიმაღლეებს მიაღწევს", - ნათქვამია პრეზიდენტის განცხადებაში.

პრეზიდენტი იმედოვნებს, რომ საქართველო-თურქეთის ურთიერთობა უფრო მეტად გაღრმავდება.

გამოცემა Andolu-ს ინფორმაციით, რეჯეპ ტაიპ ერდოღანმა ხმების 52,5 პროცენტი მიიღო. მისმა მთავარმა მოწინააღმდეგემ, მუჰარემ ინჩემ კი 30,6 პროცენტი. ეს შედეგები ცხადყოფს, რომ მეორე ტური არ იქნება.

საპრეზიდენტო არჩევნებთან ერთად თურქეთში საპარლამენტო არჩევნებიც ჩატარდა. ამ ეტაპზე ერდოღანის სამართლიანობისა და განვითარების პარტია ხმების 42 პროცენტით ლიდერობს. თურქეთის საარჩევნო კომისიის განცხადებით საბოლოო შედეგები 29 ივნისს გამოცხადდება.

ოფიციალური შედეგების გამოცხადების შემდეგ ერდოღანმა ხალხს მიმართა და განაცხადა, რომ გაიმარჯვა დემოკრატიამ და თურქეთი დანარჩენი მსოფლიოსთვის სამაგალითო იქნება.

თურქეთში 24 ივნისს ვადამდელი საპრეზიდენტო და საპარლამენტო არჩევნები ჩატარდა. ეს არჩევნები ისტორიული იქნება, რადგან აღმასრულებელი ფუნქცია დაეკისრება პრეზიდენტს და პრემიერ-მინისტრის თანამდებობა გაუქმდება.

რეჯეფ ტაიპ ერდოღანი ხელისუფლების სათავეში 2023 წლამდე იქნება და მორიგ საპრეზიდენტო არჩევნებშიც შეძლებს მონაწილეობის მიღებას.