თავის გეგმებში ჩამოუყალიბებლობა და არაკონსტიტუციური ქმედება - ასეთია ოპოზიციური პარტიების ნაწილის შეფასებები პრემიერ-მინისტრობის კანდიდატის მიერ დაგეგმილ სამთავრობო ცვლილებებთან დაკავშირებით. პრემიერობის კანდიდატმა, მამუკა ბახტაძემ "დროებით მთავრობასა" და სამინისტროების რაოდენობის 14-დან 11-მდე შემცირებაზე დღეს, 18 ივნისს ისაუბრა.

ბახტაძე სამთავრობო ცვლილებებს მას შემდეგ გეგმავს, რაც მთავრობის შემადგენლობაში სტრუქტურული ცვლილებები შევა და დამტკიცდება.

პრემიერ-მინისტრობის კანდიდატის გეგმები კრიტიკულად შეაფასეს საპარლამენტო და არასაპარლამენტო ოპოზიციაში. On.ge გთავაზობთ მათ კომენტარებს.

ევროპული საქართველო

ევროპული საქართველოს წევრის, სერგო რატიანის თქმით, უპრეცენდენტოა 3-კვირიანი დროებითი მთავრობა. რატიანმა აღნიშნა, რომ ცვლილებების მიღებაში მთავარი პარტიის თავმჯდომარე, ბიძინა ივანიშვილია, რომელსაც ჯერჯერობით სამოქმედო გეგმა არ ჩამოუყალიბებია.

"ბიძინა ივანიშვილმა საჭადრაკო დაფაზე დააყენა თავისი პაიკები და ოფიცრები, მაგრამ ჯერჯერობით არ განუმარტავს მათთვის სად რომელი უნდა დადგეს", - განაცხადა საპარლამენტო უმცირესობის წარმომადგენელმა რუსთავი 2-თან საუბარში.

ერთიანი ნაციონალური მოძრაობა

ენმ-ის ლიდერის, ნიკა მელიას თქმით, მმართველ პარტიას არ აქვს კონკრეტული სამოქმედო გეგმა და მსოფლიოში არ ყოფილა პრეცენდენტი, როცა სახელმწიფოში 3-კვირიანი მთავრობა დაუმტკიცებიათ. მელია მთავარ გამოსავალს ქართული ოცნების გადადგომაში ხედავს.

"საზოგადოება, სამოქალაქო სექტორი, ყველა ღირსეული ოპოზიციური პარტია აუცილებლად უნდა იყოს აქტიური, როგორც არასდროს, რომ რაც შეიძლება სწრაფად ქვეყნის განვითარება დავიწყოთ. ქვეყნის განვითარებას არ ექნება ადგილი, სანამ ქართული ოცნება იქნება მართვის სადავეებთან", - უთხრა რუსთავი 2-ს მელიამ.

შენების მოძრაობა

შენების მოძრაობის ლიდერის, დავით უსუფაშვილის აზრით, პრემიერ-მინისტრობის კანდიდატის, მამუკა ბახტაძის მიერ წარდგენილი გეგმა არაკონსტიტუციურია, რადგან თუ პრემიერმა ახალი შემადგენლობა არ წარადგინა, ქვეყანას ფორმალურად დამტკიცებული მთავრობა დარჩება.

"ასე სახაჭაპურეც კი არ იმართება, არათუ სახელმწიფო. საჭიროა სასწრაფოდ დასახელებულ კანდიდატს ვინმემ კონსტიტუცია მიაწოდოს", - ამბობს უსუფაშვილი.

არასაპარლამენტო ოპოზიციის წევრის განმარტებით, პროცესში დიდი პასუხისმგებლობა პარლამენტს ეკისრება.

"ერთადერთი იმედი ახლა პარლამენტზეა. იქნებ, პარლამენტში მაინც ეყოს ვინმეს ცოდნაც, სახელმწიფოებრივი აზროვნებაც, მიდგომებიც და ახალ პრემიერობის კანდიდატს ამ საწყის ეტაპზევე კარგად განუმარტონ, რა საქმეს კიდებს ხელს და რა ჩარჩოებში უნდა ჩასვას საკუთარი თავი და მთავრობა", - განაცხადა შენების მოძრაობის წევრმა.

ახალი საქართველო

ახალი საქართველოს ლიდერი, გიორგი ვაშაძე მიიჩნევს, რომ "მცირე მთავრობის მოდელი" ფუნდამენტურად ახალი ტიპის მენეჯმენტს მოიცავს და არა სამინისტროების გაერთიანებასა და უწყებების შერწყმას.

"ხუთი დეპარტამენტი ერთი სამინისტროს ქვეშ იქნება თუ ორი სამინისტროს ქვეშ, ამას გადამწყვეტი მნიშვნელობა არ აქვს ქვეყნის განვითარებისთვის", - ამბობს ვაშაძე რუსთავი 2-თან საუბრისას.

მისივე თქმით, პრემიერის აღნიშნული გადაწყვეტილება მთავრობაში გარკვეული კადრების, მათ შორის, წულუკიანისა და გახარიას შენარჩუნებისკენაა მიმართული.

დემოკრატიული მოძრაობა - ერთიანი საქართველო

პარტიის ლიდერის, ნინო ბურჯანაძის თქმით, სამინისტროების რიცხვის შემცირებას არ აქვს მნიშვნელობა, მათ სათავეში კომპეტენტური პირების ყოფნაა მთავარი.

"მე მაქვს პრეტენზია ბიძინა ივანიშვილთან მიმართებაში და არა რომელიმე მინისტრთან მიმართებაში. არავითარი მნიშვნელობა არ აქვს, ვინ იქნება რომელი სამინისტროს სკამზე, სანამ ბიძინა ივანიშვილი მართავს ყველაფერს", - ამბობს ბურჯანაძე.

დემოკრატიული მოძრაობა - ერთიანი საქართველოს ლიდერის აზრით, ერთადერთი გამოსავალი ხელისუფლების რადიკალური და სრული ცვლილებაა, რაც შესაძლებელია არჩევნების გზით.