ხორავას ქუჩაზე მოკლულის მამა ზაზა სარალიძე სამთავრობო ცვლილებებს გამოეხმაურა. მისი თქმით, კვირიკაშვილის გადადგომა მისი და მაჩალიკაშვილის საქმის გადაფარვის მცდელობაა.

სარალიძის თქმით, როცა მთავრობა ოფიციალურად დამტკიცდება, ის ახალ პრემიერ-მინისტრთან შეხვედრას მოითხოვს.

"ახალ პრემიერს ვთხოვ, რომ პირად კონტროლზე აიყვანოს საქმე. კვირიკაშვილი გადააყენეს სპეციალურად, რომ თვალყური ვერ მიედევნებინა ჩემი საქმისთვის. ახალ პრემიერ-მინისტრთან პირდაპირი მოთხოვნა მექნება, რომ ამ საქმეზე პასუხისმგებლობა აიღოს", - განაცხადა ზაზა სარალიძემ.

ხორავას ქუჩაზე მოკლული დავით სარალიძის მამის, ზაზა სარალიძის გამოკითხვა შინაგან საქმეთა სამინისტროში დღეს განახლდება. ხორავას ქუჩის საქმეზე გამოძიება უწყებამ რამდენიმე კვირის წინ გადაიბარა. სწორედ ამ გამოძიების ფარგლებში იკითხება ზაზა სარალიძე.

ფინანსთა მინისტრის მოვალეობის შემსრულებელი მამუკა ბახტაძე უმრავლესობამ პრემიერ-მინისტრობის კანდიდატად დაასახელა.

ქართული ოცნების მმართველობის პერიოდში მესამე პრემიერ-მინისტრმა გიორგი კვირიკაშვილმა 13 ივნისს პრემიერ-მინისტრის თანამდებობა დატოვა. საქართველოს კონსტიტუციის თანახმად, პრემიერის გადადგომასთან ერთად, მთავრობის შემადგენლობაც გადამდგარად ითვლება.