ორგანიზატორების განცხადებით, 17 მაისის აქცია იქნება ღია და ადგილზე თავისუფლად მისვლა შეეძლება ყველა დაინტერესებულ პირს. ჰომოფობიასა და ტრანსფობიასთან ბრძოლის საერთაშორისო დღეს 19 საათზე მთავრობის კანცელარიასთან თანასწორობის მოძრაობის აქცია გაიმართება.

აქციის ორგანიზატორები დაინტერესებულებს მოუწოდებენ, რომ თუკი სურვილი აქვთ, მათივე უსაფრთხოებისთვის, სამართალდამცავებით დაცული ტრანსპორტით მივიდნენ კანცელარიასთან, რეგისტრაცია უნდა გაიარონ 16 მაისს, საღამოს 6 საათამდე.

ლგბტ აქტივისტები აცხადებენ, რომ შეკრების მიზანია ხელისუფლებას, პოლიტიკოსებსა და პოლიტიკურად ანგაჟირებულ ჯგუფებსა თუ დაჯგუფებებს უთხრან, რომ ფუჭია საზოგადოებაში შუღლის გაღვივების ყველანაირი მცდელობა.

"ჩვენ, ლგბტ/ქვიარ აქტივისტები, ჩვენი მეგობრები, ოჯახის წევრები და მხარდამჭერები, ადგილობრივი და საერთაშორისო ორგანიზაციების წარმომადგენლები და რაც ყველაზე მნიშვნელოვანია - საქართველოს თავისუფალი მოქალაქეები ვიკრიბებით იმისთვის, რომ შევახსენოთ საზოგადოებას სიძულვილისა და აგრესიის დამანგრეველი შედეგები",- ნათქვამია ორგანიზატორების განცხადებაში.