საქართველოს ყოფილი პრეზიდენტი მიხეილ სააკაშვილი 12 მაისს, თბილისში, კლუბებზე ჩატარებულ სპეცოპერაციებს გამოეხმაურა:

"ნარკოპოლიტიკასთან მიმართებაში ჩვენც გვქონდა შეცდომები, მაგრამ ამ შეცდომების პირობებშიც კი, ასეთი სისულელე არავის მოსვლია თავში".

სააკაშვილის თქმით, კლუბებზე თავდასხმას ყველაზე დატვირთულ დროს და ხალხმრავალ ვითარებაში, არაფერი აქვს საერთო ნარკოტიკებთან ბრძოლასთან:

"ეს იყო წმინდა წყლის დამაშინებელი აქცია".

სააკაშვილი ამბობს, რომ ნარკოტიკებთან საბრძოლველად ყველა მსხვილი ბარიგის ვინაობაც და მისამართიც ცნობილია:

"ამ ყველაფერს ვერ ეხებიან, რადგან არსებობს მფარველები და მფარველობენ უმაღლეს დონეზე. ამიტომ პოლიციას უბრძანეს, რეალური წყაროების ნაცვლად, წმინდა რუსული სტილის დემონსტრირებით შემოიფარგლოს.

გასამკაცრებელია საზღვრის კონტროლი. მომხმარებლების დევნის ნაცვლად, დაკავდნენ მსხვილი გამსაღებლებით. ასევე საჭიროა, გონივრული საინფორმაციო კამპანია, რათა ახალგაზრდებს ავუხსნათ, თუ რა რისკის შემცველია ნარკოდამოკიდებულება, მათი სიცოცხლისთვის".

12 მაისს, შუაღამისას, სპეცრაზმი კლუბ ბასიანსა და კაფე გალერი შევიდა. სამართალდამცავებმა შენობაში მყოფი ადამიანები გარეთ გამოიყვანეს და საგამოძიებო ღონისძიებების განხორციელება დაიწყეს. შსს-ს განმარტებით, მათ კლუბის ტერიტორიაზე რვა ნარკორეალიზატორი დააკავეს.

დაპირისპირება იყო პოლიციელებსა და მოქალაქეებს შორის კლუბ ბასიანთან და პარლამენტის წინ. არაოფიციალური ინფორმაცით, ადმინისტრაციული წესით დააკავეს ათეულობით ადამიანი. შსს-ს თქმით, ყველა მათგანი უკვე გათავისუფლებულია.

რა მოხდა კლუბ ბასიანთან და კაფე გალერისთან - 12 მაისის მოვლენების დეტალები