საქართველოს პრეზიდენტის საპარლამენტო მდივანი ანა ნაცვლიშვილი აცხადებს, რომ სწრაფად უნდა შეისწავლონ 12 მაისს, კლუბებში ჩატარებული სპეცოპერაციების აუცილებლობა:

"შინაგან საქმეთა სამინისტროს აქვს ნარკოტიკების უკანონო რეალიზაციასთან ბრძოლის ვალდებულება. ეს ბრძოლა უნდა მიმდინარეობდეს ეფექტიანად და მუდმივად, მაგრამ რაც გუშინ ვნახეთ თბილისში ჩატარებული სპეცოპერაციის სახით, ის კადრები რაც ვრცელდება მედიით, ცხადყოფს, რომ აუცილებელია სპეცოპერაციასთან დაკავშირებული ყველა ფაქტი და გარემოება სწრაფად მიუკერძოებლად და დეტალურად იყოს შესწავლილი"

ანა ნაცვლიშვილის თქმით, საზოგადოებაში გაჩენილ კითხვებს სწრაფად უნდა გაეცეს ამომწურავი პასუხები.

პრეზიდენტის საპარლამენტო მდივანი დღეს, 3 საათზე პარლამენტთან დაგეგმილ აქციასაც შეეხო და თქვა, რომ სახელმწიფომ უნდა უზრუნველყოს ყველაფერი, რათა მოქალაქეებმა შეძლონ კონსტიტუციური უფლებებით შეუფერხებლად სარგებლობა.

12 მაისს, შუაღამისას, სპეცრაზმი კლუბ ბასიანსა და კაფე გალერი შევიდა. სამართალდამცავებმა შენობაში მყოფი ადამიანები გარეთ გამოიყვანეს და საგამოძიებო ღონისძიებების განხორციელება დაიწყეს. შსს-ს განმარტებით, მათ კლუბის ტერიტორიაზე რვა ნარკორეალიზატორი დააკავეს.

დაპირისპირება იყო პოლიციელებსა და მოქალაქეებს შორის კლუბ ბასიანთან და პარლამენტის წინ. არაოფიციალური ინფორმაცით, ადმინისტრაციული წესით დააკავეს ათეულობით ადამიანი. შსს-ს თქმით, ყველა მათგანი უკვე გათავისუფლებულია.