შს მინისტრის გიორგი გახარიას ინფორმაციით, კომუნიკაციების მარეგულირებელ კომისიასთან მუშაობის შედეგად, დაბლოკილია ის საიტი, საიდანაც მოქალაქეები ნარკოტიკულ ნივთიერებას ყიდულობდნენ. მინისტრის თქმით, მიუხედავად მათი ქმედებისა, მომხმარებელი მაინც ახერხებს იგივე საიტზე ნარკოტიკის შეძენას:

"საიტი დავბლოკეთ, თუმცა მოგეხსენებათ, რომ თანამედროვე ტექნოლოგიების პირობებში არსებობს სხვადასხვა გზა, გვერდის ავლით, იგივე საიტზე მოსახვედრად. ჩვენ ამ პროცესში ვართ დღესაც".

მინისტრმა დაადასტურა, სავარაუდოდ, ზედოზირების შედეგად გარდაცვალების ორი შემთხვევა, თუმცა, მისივე თქმით, მიზეზის დასადგენად ჯერჯერობით ექსპერტიზა მუშაობს:

"გამოძიება მიმდინარეობს და ის განიხილავს ყველა ვერსიას".

საქმეზე უკვე დაწყებულია გამოძიება სსკ-ის 115-ე მუხლით, რაც თვითმკვლელობამდე მიყვანას გულისხმობს.

ორი ადამიანის გარდაცვალების ფაქტს ადასტურებს კლუბ ბასიანის დამფუძნებელი, ნაჯა ორაშვილი. ის ფეისბუქის საკუთარ გვერდზე წერს, რომ კლუბის ტერიტორიზე რამდენიმე კვირის წინ ნამდვილად დაფიქსირდა რამდენიმე ადამიანის ზედოზირების შემთხვევა. მისივე ცნობით, ამ ადამიანების სიცოცხლეს და ჯანმრთელობას საფრთხე აღარ ემუქრებათ.