შინაგან საქმეთა სამინისტრომ ძაღლების გადარჩენისა და დაცვის ასოციაციის ხელმძღვანელთან, თამაზ ელიზბარაშვილთან დაკავშირებით გამოძიება დაიწყო.

შინაგან საქმეთა სამინისტრომ გამოძიება დაიწყო ძალადობის საქმეზე, საქართველოს სსკ-ს 126-ე მუხლის პირველი ნაწილით, რაც ჯარიმას ან 1 წლამდე ვადით თავისუფლების აღკვეთას ითვალისწინებს.

უწყების განმარტებით, გამოძიებას საფუძვლად დაედო მიმდინარე წლის 11 აპრილს მედიით გავრცელებული ვიდეომასალა, სადაც ძაღლების გადარჩენისა და დაცვის ასოციაციის ხელმძღვანელი თავის თანამშრომელს სიტყვიერ და ფიზიკურ შეურაცხყოფას აყენებს.

ფეისბუქში გავრცელდა ვიდეო, რომელზეც ჩანს, რომ თამაზ ელიზბარაშვილი თანამშრომელს თავში ურტყამს და აგინებს.

როგორც On.ge-ს თამაზ ელიზბარაშვილმა განუცხადა, მისი გაღიზიანება თანამშრომლის ნასვამ მდგომარეობაში ყოფნამ გამოიწვია.

თამაზ ელიზბარაშვილმა ძაღლების თავშესაფარს დახურვა გადაწყვიტა. ელიზბარაშვილის თქმით, ქალაქი მისნაირი ადამიანების ღირსი არ არის.