საქართველოს პარლამენტმა რუსეთის ფედერაციის მიერ ოკუპირებულ აფხაზეთსა და ცხინვალის რეგიონში ადამიანის უფლებების უხეში დარღვევისა და ოთხოზორია-ტატუნაშვილის სიის შესახებ რეზოლუცია 106 ხმით დაამტკიცა. რეზოლუციის საწინააღმდეგო ხმა არც ერთ დეპუტატს არ მიუცია, 4 დეპუტატს კი კენჭისყრაში მონაწილეობა არ მიუღია.

რეზოლუციის პროექტი უმცირესობასა და უმრავლესობას შორის შეთანხმებული ვარიანტია, რომელშიც ასახულია ევროპული საქართველოს ინიციატივა ოთხოზორია-ტატუნაშვილის სიის შექმნის შესახებ.

საქართველოს მთავრობამ 2018 წლის 15 ივნისამდე პარლამენტს უნდა წარუდგინოს ოკუპირებულ ტერიტორიებზე საქართველოს მოქალაქეთა მკვლელობაში, გატაცებაში, წამებასა და არაჰუმანურ მოპყრობაში, ჯანმრთელობის მძიმე დაზიანებაში, აგრეთვე ამ დანაშაულთა დაფარვაში ბრალდებულ და მსჯავრდებულ პირთა ე.წ. ოთხოზორია-ტატუნაშვილის სია.

არჩილ ტატუნაშვილი 22 თებერვალს ცხინვალის ციხეში გაურკვეველ ვითარებაში გარდაიცვალა. მისი ცხედარი 26 დღიანი ლოდინის შემდეგ, საქართველოს ხელისუფლებას ოც მარტს გადასცეს. რეზოლუციის მიღების საკითხი პარლამენტში არჩილ ტატუნაშვილის გარდაცვალების შემდეგ გახდა აქტუალური.

რეზოლუცია სრულად იხილეთ აქ.