შინაგან საქმეთა სამინისტროში, On.ge-ს განუცხადეს, რომ ახალქალაქში, სოფელ ვაჩიანში, დედისა და სამი შვილის მკვლელობის ფაქტზე გამოძიება სისხლის სამართლის კოდექსის 109-ე მუხლით დაიწყო, რაც დამამძიმებელ გარემოებაში ჩადენილ განზრახ მკვლელობას გულისხმობს.

გუშინ, 10 ივლისს, მეზობელმა 37 წლის ქალი და მისი სამი შვილი, საკუთარ სახლში გარდაცვლილი ნახეს. უწყებაში გამოძიების ინტერესებიდან გამომდინარე, დამატებით დეტალებზე არ საუბრობენ.

სამხრეთის კარიბჭის ინფორმაციით, მომხდარზე ძიება თავდაპირველად 240-ე მუხლის მე-2 ნაწილით დაიწყო, რაც გულისხმობს უსაფრთხოების წესების დარღვევას. თუმცა, მოგვიანებით საქმე გადაკვალიფიცირდა, რადგან გარდაცვლილებს ძალადობის კვალი აღენიშნებოდათ.

იგივე გამოცემა წერს, რომ სახლში დედა და სამი შვილი ცხოვრობდნენ, ქმარი კი რუსეთში სამუშაოდ იყო წასული.